هەرێم نیوز
ئەنەکەسە رایدەگەیەنێت، ئەو گردبوونەوانەی ئەحمەد شەرع داوای کرد دژایەتی کورد و پێکهاتەکانی سوریابوو، دەبێت حکومەتی کاتیی وڵاتەکە هەڵوێستیان لەبارەی هەبێت.
ئەنجومەنی نیشتمانی کورد لە سوریا لە راگەیاندراوێکدا بڵاویکردەوە، ئەو گردبونەوانەی ئەحمەد شەرع داوای کردبوو، گوتاری دنەدان و رەگەزپەرستانەیان تیادا بەرزكرایەوە دژی گەلی کوردو پێکهاتەکانی دیکەی سوریا، داواش لە حکومەتی کاتيی لە دیمەشق دەكات هەڵوێستێکی روون و ئاشکرای رەتکردنەوەی ئەم گوتارانەی هەبێت.
راشیگەیاند: جەختدەكەینەوە رێگای سەقامگیری بە دانپێدانانی راشکاوانە دەست پێدەکات بەوەی سوریا دەوڵەتێکی فرە نەتەوەیی و فرە ئایینی و تائیفەی جۆراوجۆرەو دەبێت دەستورەکەی مافەکانی هەمووان بە مافە نەتەوەییەکانی گەلی کوردیشەوە لە چوارچێوەی یەکێتی خاكی سوریا مسۆگەر بکات.
ئاماژەی بەوەشكردووە: ئەنەكەسە پابەندبونی خۆی بە کارکردن لەپێناو سوریایەکی نا ناوەندی و دیموکراسی و فرەیی دووپات دەكاتەوە، کە شكۆی هەموو هاوڵاتیانی تێدا پارێزراو بێت و رێز لە فرەچەشنی نەتەوەیی و ئایینی بگیرێت، دوور لە گوتاری تەخوینكردن و هاندان و توندوتیژی.
ئەوەش دوای ئەودێت کە لە کاتی ئاڵۆزییەکانی نێوان عەلەوییەکان و حکومەتی وڵاتەکەدا، ئەحمەد شەرع لەڕێگەی پەیامێکی ڤیدیۆیی یەوە داوای لە لایەنگرانی کرد بڕژێنە سەر شەقام و پارێزگاریی لە یەکییەتی و یەکپارچەی وڵاتەکە بکەن.
ئەنەکەسە پابەندبونی خۆی بە کارکردن لەپێناو سوریایەکی ناناوەندیی و دیموکراسیی و فرەیی دووپات کردوەتەوە، کە شكۆی هەموو هاووڵاتییانی تێدا پارێزراوبێت و ڕێز هەمووان بگرێت بەبێ یەکترسڕینەوەی ئەوانی دیکە.