هەرێم نیوز
به‌ڕێوه‌به‌رایه‌تی هاتوچۆی هەولێر ڕایدەگەیەنێت، ئەنجامدانی گرێبەستی ئەلیکترۆنی لە کاتی مامەڵەی کڕین و فرۆشتنی ئۆتۆمبێل کارێکی باش بو، به‌ڵام هه‌ندێك كه‌س ئه‌و مامه‌ڵه‌یان به هه‌ڵه ده‌كرد و خه‌ڵكیان توشی زیان ده‌كرده‌وه.
ده‌شڵێت، بۆ دوبارە ڕێکخستنەوەی گرێبەستی ئەلیکترۆنی بڕیاریداوە کە ئەو گرێبەستە لەدوای کاتژمێر ٢ی دوای نیوەڕۆ کارابکرێت بۆ ڕێگەگرتن لەو گرفتانەی ڕویان دەدا.
دەقی راگەیاندراوەکە:
ڕوونکردنەوەیەک لە هاتووچۆی هەولێرەوە سەبارەت بە ڕێکخستنەوەی گرێبەستی ئەلیکترۆنی ...
وەک لای هەمووان ئاشکرایە ئەنجام دانی گرێبەستی ئەلیکترۆنی لە کاتی مامەڵەی کڕین و فرۆشتنی ئۆتۆمبێل کارێکی باش بو لەلایەن وەزارەتی ناوخۆ بڕیاری لەسەر درا بۆ زامن کردنی مافی یاسایی کریار و فرۆشیار لەکاتی مامەڵەی کڕین و فرۆشتنی ئۆتۆمبێل کە ئەم ئەرکە بەکەس و لایەنی شارەزاو تایبەت مەند سپێردرا بۆ ئەنجام دانی ئەم گرێبەستە .
بەڵام هەندێک کەس ئەم هەنگاوەیان قۆستەوە بۆ بەرژەوندی مادی خۆیان کە هەستان بە ئەنجام دانی ئەم گرێبە ستە بۆ کریار و فرۆشیاران لەناو کابینە هەندێک جار لەناو ئۆتۆمبێل لە سەرشەقامە کان و کەسانێکیش چاو ساغی و دەلالیان بۆ دەکردن کە هەم سیمایەکی ناشارستانی بو هەم ئیستغلالی هاوڵاتیان دەکرا.
وە ئەوەی جێگای سەرەنجە کەسانێکی ناشارەزا گرێبەستەکەیان ئەنجام دەدا کە زۆر ترین هەڵەیان ئەنجام دەدا لە کاتی پرکردنەوەی گرێبەستەکە کە لەئەنجام دا هاوڵاتی تووشی کێشە دەبوو . دەبوایە گرێبەستەکە هەڵبەوەشێنێتەوە دووبارە گرێبەستێکی تر ئەنجام بداتەوە . کە کاتێکی زۆری بەفێڕو دەڕۆیشت و زیانی مادیشی پێدەگەیشت.
بۆیە بەڕێوەبەرایەتیەکەمان بۆ دووبارە ڕێکخستنەوەی گرێبەستی ئەلیکترۆنی بڕیاری داوە کە ئەم گرێبەستە لەدوای کاتژمێر (٢:٠٠) دوای نیوەڕۆ کارا بکرێت بۆ ڕێگە گرتن لەو گرفتانەی ڕوویان دەدا.
وە داوا لەهاوڵاتیان دەکەین کە گرێبەستی ئەلیکترۆنی لە شوێنە تایبەت مەندەکان و لای کەسانی شارەزا ئەنجام بدەن.
ڕاگەیاندنی هاتووچۆی هەولێر