هەرێم نیوز
بەپێی ئەو خشتەیەی وەزارەتی دارایی بڵاویکردوەتەوە، ئەمڕۆ دەست بەدابەشکردنی موچەی مانگی ئەیلول دەکرێت و لە ماوەی سێ رۆژدا سەرجەم وەزارەت و دەستەکان موچەکانیان وەردەگرن.
وەزارەتی دارایی و ئابووری هەرێم دەست بە دابەشکردنی مووچەی مانگی ئەیلوولی فەرمانبەران و مووچەخۆرانی هەرێم دەکات و بۆ ئەمڕۆ یەکشەممە، هەریەکە لە وەزارەتەکانی پەروەردە، تەندروستی، خوێندنی باڵاوتوێژینەوەی زانستی، خانەنشینی پێشمەرگەو مەدەنی، زیندانییە سیاسییەکان، بەرکەوتوانی کیمیاباران، کەسوکاری شەهیدان و ئەنفالکراوان و وەزارەتی کاروباری شەهیدان و ئەنفالکراوان مووچە وەردەگرن.
وەزارەتی دارایی ڕۆژی شەممە رایگەیاند، بەهۆی ئەوەی وەرگرتنی پارە بەشێوەی کاش لەلقی هەولێری بانکی ناوەندی عێراق کەوتە ئەمڕۆ، لەکاتی دوامی فەرمی و دواتر گواستنەوەی پارەکە بۆ سەرجەم بانکەکان لە پارێزگاو ئیدارە سەربەخۆکان، داوا لە سەرجەم مووچەخۆران دەکەین لەدوای کاتژمێر یەکی نیوەرۆ سەردانی بانکەکان بکەن بەمەبەستی وەرگرتنی مووچەکانیان بە پێی خشتەی ڕاگەیەندراو.
ئەمەش لە کاتێکدایە، دوێنێ شەممە بڕی 941 ملیار و 874 ملیۆن دینار وەک تەمویلی موچەی مانگی ئەیلولی فەرمانبەران و موچەخۆرانی هەرێمی کوردستان خرایە سەر هەژماری بانکی وەزارەتی دارایی و ئابوری هەرێمی کوردستان لەلقی هەولێری بانکی ناوەندی عیراق.