هەرێم نیوز
پەیوەندییەگشتییەکان و راگەیاندنی فڕۆکەخانەی نێودەوڵەتی سلێمانی بڵاویکردەوە: ئەمڕۆ ده‌سه‌ڵاتی فڕۆکه‌وانی شارستانی تورکیا ئاگادارینامەی (NOTAM) لە سایتی جیهانی بڵاوکردنەوەی ئاگاداری نامە ئەلەکترۆنییەکانی (NOTAM) لابرد. بەوەش ده‌سه‌ڵاتی فڕۆکه‌وانی شارستانی تورکیا گەشتە ئاسمانییەکان و ئاسمانی وڵاتەکەی بەڕووی گەشتەکان بۆ فڕۆکەخانەی نێودەوڵەتی سلێمانی ئاسایی کردەوە .
پەیوەندییەگشتییەکان و راگەیاندنی فڕۆکەخانەی نێودەوڵەتی سلێمانی لە راگەیەنراوێكدا ئاماژەی بەوەشکرد: بەم بۆنەیەوە پیرۆزبایی لە گەشتیاران و هاونیشتمانیانمان دەکەین و هیوادارین لە زووترین کــاتـدا، سەرجەم هێڵە ئاسمانییەکان خشتەی گەشتەکانیان بۆ تورکیا و ووڵاتانی تری ئەوروپا و جیهان رێکبخەنەوە.
لەلایەكی ترەوە، رێباز محەممەد، بەڕێوەبەری فڕۆکەخانەی نێودەوڵەتیی سلێمانی راگەیاند: گەشتەکانی فڕۆکەخانەی نێودەوڵەتی سلێمانی بۆ تورکیا 3ی مانگی داهاتوو دەستپێدەکەنەوە.
رێباز محەممەد دەڵێت: لە سەرەتاوە هەفتانە 5 گەشت دەبن، بەڵام دواتر گەشتەکان دەبنە رۆژانە.
جێی ئاماژەیە لە دواین سەردانی بۆ تورکیا، نێچیرڤان بارزانی لەگەڵ ئەردۆغان سەرۆکی ئەو وڵاتە کۆبووەوە و لەسەر خواست و داواکاری سەرۆکی هەرێم قەدەغەی سەر فڕۆکەخانەی سلێمانی هەڵگیرا.