هەرێم نیوز 

بەڕ‌‌ێوەبەری پسوڵەی خۆراكی سلێمانی ڕایگه‌یاند، نزیكەی 5 ملیۆن هاوڵاتی هەرێمی كوردستان پسووڵەی ئەلیكترۆنی خۆراكیان پڕكردووەتەوە، دەشڵیت، تا ئێستا 86٪ی هاووڵاتیان لەسەرجەم پارێزگاكانی هەرێم فۆڕمی خۆراكەكانیان كردووە بە ئەلكترۆنی

ئەمڕۆ چوارشەممە 3ی ئەیلولی 2025 ئاراس محەمەد، بەڕ‌‌ێوەبەری پسوڵەی خۆراكی سلێمانی لە لێدوانێكی رۆژنامەوانیدا رایگەیاند:" تا ئێستا 86٪ی هاووڵاتیان لەسەرجەم پارێزگاكانی هەرێم فۆڕمی خۆراكەكانیان كردووە بە ئەلكترۆنی كە دەكاتە 4 ملیۆن و 652 هەزار و 283 كەس."

وتیشی:" لەژمارەیە ملیۆنێك و 741 هەزار و 907 كەسیان لەپارێزگای هەولێرن كە دەكاتە 88٪ و ملیۆنێك و 704 هەزار و 828 كەسیان لە لەپارێزگای سلێمانین كە دەكاتە 87٪ و ملیۆنێك 102هەزار و 774 كەسیان لە پارێزگای دهۆكن كە دەكاتە 83٪ و 102هەزار و 774 كەسیان لە پارێزگای هەڵەبجەن كە دەكاتە 89٪ كەس."

بەڕ‌‌ێوەبەری پسوڵەی خۆراكی سلێمانی روونیكردەوە:" ئەو هاووڵاتییانەی پرۆسەكەیان ئەنجامنەداوە و خۆیان تۆمارنەكردووە، بەشەخۆراكەكانیان دەبڕدرێت، بەڵام لە كاتی چالاككردنەوەی بەرنامەكەدا دەتوانن خۆیان تۆماربكەن، ئەوەش بە مەرج دەبێت و قەرەبووی بەشەخۆراكە فەوتاوەكانیشیان ناكرێتەوە."

ئاراس محەمەد، ئاماژەی بەوەدا:" لەكاتی چالاككردنەوەی بەرنامەكەدا، پێویستە هاووڵاتیان بە پارە فۆڕمەكانیان پڕ بكەنەوە، كە بۆ هەر هاووڵاتییەك 10 هەزارە و بڕی هەزار دیناری زیادەشی خراوەتە سەر بۆ دروستكردنی نەخۆشخانە و خوێندنگە، بەمەش بڕی پارەكە دەبێت بە 11 هەزار دینار و لەڕێگەی كارتی بانكییەوە دەدرێت."