هەرێم نیوز
سەرۆکى هەرێمى کوردستان رایگەیاند، سەردانەکەى ئەردۆغان بۆ بەغداد و هەولێر مێژووییە و چاوەڕێى ئەوە دەکات لە هەولێر پێشوازى لێبکات، دەشڵێت "لەگەڵ ئەردۆغاندا باس لە کەیسەکانى ئاشتى، سەقامگیرى، گەشەپێدان و ئابوریى دەکەن".
نێچیرڤان بارزانی، سەرۆکی هەرێمی کوردستان لە پۆستێکی تۆڕی کۆمەڵایەتیی ئێکس تویتەری پێشوو، نوسیویەتی: "سەردانە مێژووییەکەی سەرۆک ئەردۆغان بۆ بەغدا و هەولێر لە کاتێکی هەستیاری ناوچەکەدا دێت."
ئاماژەی بەوەشداوە، "سەردانەکە ئاماژەیە بۆ پەیوەندییە بەهێزە سیاسی، ئابووری و ئەمنییەکانی عێراق و هەرێمی کوردستان لەگەڵ تورکیا."
دەشڵێت : چاوم لەوەیە لە هەولێر پێشوازی لە سەرۆک ئەردۆغان بکەم بۆ ئەوەی پرسە گەرمەکان، لە نێویاندا، ئاشتی، سەقامگیری و گەشەی ئابووری تاوتوێ بکەم.
ئەمەش لە کاتێکدایە، ئەمڕۆ دووشەممە 22ـى 4ى 2024، رەجەب تەیب ئەردۆغان، سەرۆککۆمارى تورکیا گەیشتە بەغداد و بڕیارە لەگەڵ سەرۆککۆمار و سەرۆکوەزیرانى عێڕاق کۆببێتەوە، دواتریش سەردانی شاری هەولێر بکات.