هەرێم نیوز
سەرۆکوەزیرانی عێراق رایدەگەیەنێت، نابێت پەیوەندییەکانمان لەگەڵ ئەمەریکا تەنیا لە بواری ئەمنیی کورت بکرێتەوە، جەختی لەوەش کردەوە، سەردانەکەی بۆ ئەمەریکا لەپێناو کردنەوەی لاپەڕەیەکی نوێیە لە پەیوەندییەکانی نێوان عێراق و ئەمەریکا.
محەمەد شیاع سودانی سەرۆک وەزیرانی عێراق لە واشنتنەوە لە کۆنفرانسێکی رۆژنامەوانیدا رایگەیاند، عێراقی ئەمڕۆ تەندروستی بۆ گەڕاوەتەوە و رێگای راستی گرتوەتە بەر کە ئەویش گەشەپێدان و بنیادنان و پێشکەوتنە، عێراقییەکان سەرکەوتون بەسەر مەترسدیدارترین رێکخراوی تیرۆرستی هەر ئەوەش بو هەمو پێکهاتەکانی عێراقی یەکخست.
محەمەد شیاع سودانی ئاماژەی بەوەشکرد، لە ماوەی هەفتەیەکدا ژمارەیەک دیداری گرنگیان لەگەڵ سەرۆک و بەرپرسانی ئەمریکا ئەنجامدا، هەروەها گفتوگۆیان لەبارەی کاراکردنی رێککەوتنی ستراتیژی و پەرەپێدانی پەیوەندییە هاوبەشەکان کرد.
ئەوەشی خستەڕو، بەشێکی دیدارەکانیان لەگەڵ کۆمپانیا ئەمریکییەکان بوە و زۆربەیان ئارەزوی خۆیان بۆ کارکردن لە عێراق دەربڕیوە، هەروەها کۆبونەوەیان لەگەڵ بەرپرسی ئەمنی و ئاسایش و نوێنەرانی وەزارەتی گەنجینەی ئەمریکا کردوە.
سودانی باسی لەوەشکرد، لە کۆبونەوەیان لەگەڵ وەزارەتی گەنجینەی ئەمریکا داوای هاوبەشیی و پەرثیدانی پەیوەندییەکانیان کردوە، هەروەها داوایان کردوە پێداچونەوە بە سزای سەر بانکە عێراقییەکان بکەن، بۆ ئەو مەبەستەش بڕیاردراوە لە رێگەی لیژنەیەکەوە پێداچونەوە بە کاری ئەو کۆمپانیایەنە بکرێت.
محەممەد شیاع سوودانی، دەشڵێت: ئێمە بناغەیەکی بەردەواممان بۆ پەیوەندییەکی درێژخایەن لەگەڵ واشنتن دامەزراندووە، هەروەها نابێت پەیوەندییەکانمان لەگەڵ ئەمەریکا تەنیا لە بواری ئەمنیی کورت بکرێتەوە. وتیشی: سەردانەکەم بۆ ئەمەریکا لەپێناو کردنەوەی لاپەڕەیەکی نوێیە.
سەرۆكوەزیرانی عێراق لە درێژەی گوتەكانیدا لەئەمریكا ڕایگەیاند "ڕاگرتنی هەناردەكردنی نەوت كێشەی مووچەی بۆ مووچەخۆرانی هەرێمی كوردستان درووستكرد".
لەبارەی ناردنی موچەی هەرێمی کوردستان رایگەیاند: ێشەكانی هەرێمی كوردستان و عێراق سیاسی نین و یاسایی و هونەریین، هیوادارم بتوانین بەردەوام بین لە دابینكردنی مووچەی مووچەخۆرانی هەرێمی كوردستان، نامانەوێت كێشە یاسایی و تەكنیكییەكان بۆ سیاسی و هەڕەشەی سەر قەوارەكان بگۆڕێت.
ئاماژەی بەوەشکرد، ئێمە دەمانەوێت هەرێمی كوردستان سەقامگیر بێت و حكومەتی فیدراڵی هەوڵیداوە بارودۆخی هەرێمی كوردستان ئارام بێت و بەردەوام دەمانەوێت پەیوەندییمان لەگەڵ حكومەتی هەرێمی كوردستاندا هەبێت، دەبێت هەرێمی كوردستان داهاتی نەوت و نانەوتی ڕادەست بكات.
لەبارەی کێشەی کۆمپانیاکانی نەوت سوودانی گوتی: "لە ڕاستیدا کێشەکان کێشەیی یاسایی و دەستوورین، بڕیارێک هەیە لە دادگەی فیدرڵی کە ئەم گرێبەستانە هەڵبوەشێنرێنەوە و دەمانەوێت چارەسەر بدۆزینەوە، هەندێک کۆمپانیا هەن کارەکانیان ڕاگرتووە، بەهۆی ئەو تێچووە کە یاسای بوودجە دیاریکردووە و هەشت دۆلارە بۆ هەر بەرمیلێک و ئەوان گرێبەستیان لەگەڵ هەرێمی کوردستان بە 26 دۆلار کردووە".
سەرۆک وەزیرانی عێراق دەڵێت، لە عێراق یاسا هەیە و یاساش رێگەنادات ئەو پارەیە بۆ کۆمپانیای نەوت تەرخان بکرێت، بەڵکو پێویستە گرێبەستی کۆمپانیا نەوتییەکانی هەرێم هەمواربکرێنەوە