هەرێم نیوز
ئەمڕۆ سێشەممە، بەرێوەبەرایەتی پاسپۆرتی سلێمانی لە راگەیەندراوێکدا بڵاویکردەوە، لە پرۆسەی دەرکردنی پاسپۆرتی ئەلکترۆنی دا تەنها کارتی نیشتیمانی هاوڵاتیان کاری پێدەکرێت و ناوی هاووڵاتییان لەسەر پاسپۆرتەکە بە زمانی کوردی دەنوسرێت.
بەڕێوەبەرایەتی پاسپۆرتی سلێمانی رایگەیاند، تاکە بەڵگەنامەی پێویست بۆ دەرهێنانی پاسپۆرتی ئەلیکترۆنی کارتی نیشتمانییەوە و جگە لە پەنجەمۆری دەست پەنجەمۆری چاو بۆ رێگریکردن لە ساختەکردنی پاسپۆرتەکە وەردەگیرێت.
لە ڕاگەیەندراوەکەدا ئاماژە بەوەشکراوە، لە پاسپۆرتەکەدا گشت داتا و زانیارییە کەسییەکان و وێنە و پەنجەمۆری دەست و پەنجەمۆری چاو بەبەکارهێنانی ئامێری ناسەرەوەی چاوی خاوەن پاسپۆرتەکەی لەسەر تۆماردەکرێت کە 18نیشانەی ئەمنی تێدایە.
ئەوەشی خستەڕوو، پاسپۆرتەکە لە ماددەیەک بە ناوی پۆلى کاربۆنات دروستکراوە و بەوە جیادەکرێتەوە کە بەئەستەم ساختە دەکرێت و بەرگەى گەرماو تێکچون دەگرێت و لە ساڵى 2014 ەوە ئەم ماددەیە لە دروست کردنى پاسپۆرت بەکاردەهێندرێت.
هاوکات، لەبارەی تایبەتمەندییەکان پاسپۆرتی نوێ لەجۆری 'بی' رایگەیاند، ژمارەی پیتەکان لەو پاسپۆرتەدا بۆ 37 پیت زیادکراوە و هەڵەی نووسینی پیتە کوردییەکانی پاسپۆرتی جۆری 'ئەی' تێدا راستکراوەتەوە.
ئاشكراشیكردوە، هەردوو پەڕەیەک لە پەڕەی ڤیزا بۆ ڕەمزى شارێک تەرخانکراوە کە بۆ سلێمانى بەنداوى دوکان و بۆ هەڵەبجە مۆنۆمێنتى هەڵەبجە دانراوە.
رونیشیكردۆتەوە، هەڵگرانى پاسپۆرتى ئەلەکترۆنى سمارت گەیت لەکاتى سەفەر کردن لە فرۆکەخانەکان دەتوانن بەبێ بینینى ئەفسەر و کارمەندانى فرۆکەخانە سەفەر بکەن.
ئەمەش لەکاتێکدایە، لە 20ی مانگی تەمموزی رابردوو، بەرێوەبەرایەتی پاسپۆرتی سلێمانی بڵاویكردوە، دەستیانکردووە بە دەرهێنانی پاسپۆرتی ئەلیکترۆنی و تێچووی دەرهێنانی 91 هەزار دینارە و پێویست بە کارت بانکی دەکات و دەبێت پارەی دیناری تێدا باڵانسکرابێت.