زمان بە پێناسەو بنەمای سەرەکی هەر نەتەوەیەک دادەنرێت و یەکێکە لە پایەکانی پەیژەی ناسینی نەتەوە،بەجۆرێک لە ڕێگای زمانەوە،کەلتورو فەرهەنگ شوناسی نەتەوەکان لە جیهان دا دەناسرێتەوە. ڕۆژی جیهانی زمانی دایک بۆ ئەو کاتە دەگەڕێتەوە،کاتێ پۆلیسی پاکستان بەفەرمانی دەوڵەت لە 21ی شوباتی 1952 تەقەیان لە ژمارەیەک قوتابی مانگرتوی زانکۆی بەڕەگەز بەنگلادیشی کرد،لەکاتی مانگرتنیان و داواکاریان بۆ بەکارهێنانی زمانی بەنگلادیشی لە ناوچەی ڕۆژهەڵاتی پاکستان،بەهۆی ڕێزنەگرتن لە داواکاری‌و خۆپیشاندانەکەیان لەلایەن هێزە ئەمنیەکانی ئەو وڵاتەوە چەندین قوتابی گیانیان لەدەست دا.

بۆیە لەلایەن ڕێکخراوی کەلتوری نەتەوە یەکگرتوەکان (یونسکۆ)21ی شوباتی هەموو ساڵێک بە ڕۆژی جیهانی زمانی دایک دەسنیشان کرا وەک ڕێزێک بۆ سەرجەم زمانەکانی جیهان،بەهۆی ئەو ڕووداوەوە ساڵی 1999بە مەبەستی ڕێزگرتن و نرخ بەخشین بەسەرجەم زمانەکانی نەتەوەکانی جیهان (یونسکۆ) ڕۆژی 21 شوباتی وەک ڕۆژی جیهانی زمانی زگماکی دەستنیشان کرد. بەگشتی زانایانی بواری زمان، زمان بەو دیاردەیە شرۆڤە دەکەن و وەک ئامرازێک بۆ پەیوەندی گرتن و لێکگەیشتن بەکاردەهێنرێت، بەڕەگەزێکی سەرەکی ڕۆشنبیری ناوی دەبەن،بۆ پاراستنی کەلتوری نەتەوەکان و گواستنەوەی لە نەوەیەکەوە بۆ نەوەیەکی تر.

بەپێی دوا زانیاریەکان بێت لە جیهان دا نزیکەی شەش هەزارو حەوت سەد زمان لە جیهان دا هەن،مەترسی لەناوچونی زمانیش بەردەوامی هەیەو بەپێی دوا ئامارەکان بێت لە ساڵی 1950وە نزیکەی 200 زمان لەناو چون،پسپۆڕان و شارەزایانی بواری زمان پێیان وایە لەسەد ساڵی داهاتوودا نیوەی زمانەکانی جیهان لە لێواری لە ناوچون و هەڕەشەی نەمان دان،چونکە لە ئێستادا 184 زمان لە جیهان دا کەمتر لە 10کەس بەکاری دەهێنن.

سەبارەت بە زمانی کوردی،هەرچەندە زمانێکی دەوڵەمەندو چەندین زاراوەو دیالێکتیکی جیاوازی هەیە،بەڵام جێگای داخە تا ئێستا خاوەنی زمانێکی ستانداردی یەکگرتوو نیە،هەرچەندە سەرەڕای هەڕەشەو قەدەغەکردنی زمانی کوردی لە پارچەکانی کوردستان زمانی کوردی کاڵ نەبوتەوە و لەبەرەو پێشچونە،ئەوەش نەک لەسەر دەستی دامودەزگا دەوڵەتی و حیزبیەکان بەڵکو لەلایەن ڕۆشنبیران و هونەرمەندان و خوێنەوارانەوە زمانی کوردی پەرەی پێ دراوەو بە زیندویی هێڵدراوەتەوە. وەک ئاماژەمان پێدا زمانی کوردی لە چەندین زاراوەو دیلێکتیک پێک هاتوە کورد لە کوردستان بە چوار زاراوەی سەرەکی قسە دەکەن وەک:- ٭ زاراوەی کرمانجی باکور(کرمانجی):-

بایەزیدی،بۆتانی، هەکاری، بادینانی. شەمدینانی، زاراوەی ڕۆژئاوا. ٭ زاراوەی کرمانجی ناوەڕاست (سۆرانی):- موکریانی،سۆرانی، سلێمانی ، گەرمیانی. ٭ زاراوەی کرمانجی خواروو(لوڕ):- لوڕی ڕەسەن،بەختیاری، مامەسێنی،کۆهگڵۆ، لەک و کەڵهوڕ. ٭ زاراوەی گۆران:- گۆرانی ڕەسەن،هەورامانی، باجەلانی و زازا. سەرەڕای دیاری کردنی ڕۆژی جیهانی زمانی دایک لەلایەن ڕێکخراوی کەلتوری نەتەوەیەکگرتوەکانیشەوە زمانی کوردی لە باکورو ڕۆژهەڵات و ڕۆژئاوای کوردستان قەدەغەیەو مافی کەلتوری و خویندنیان بە زمانی کوردی وەک پێویست دەستەبەر نەکراوە، جگە لە باشوری کوردستان زمانی کوردی لە پاڵ زمانی عەرەبی زمانی فەرمی و ڕێگەپێدراوە پێکهاتەکانی تری عێراق بە هەرێمی کوردستانیشەوە ڕێگەیان پێ دراوە بە زمانی خۆیان بخوێنن و قسەی پێ بکەن بە بێ هیچ ڕێگریەک.