هێشتا مۆدێلەکانی چارەسەریی تەم و مژاوییە لەتورکیاو باکوری کوردستان و زەماناتی ناوخۆیی و دەستەبەریی ئازادیەکان و دیموکراسیەتی دام و دەزگایی فەراهەم نیە، جگەلەوەی پرۆسەی ئاشتی بە تونێلی عەقڵیەتی تەسکی فاشیزمی سەدساڵەی تورکیادا دەڕوات نەک بە تونێلی دانوستان و بێدەنگکردنی چەک و هەڵوەشاندنەوەی پارتێکی سیاسیی کە هێشتا ڕەهەندەکانی نادیارن، کورد لە باکور دەستی بۆ تەوقەی ئەهریمەن درێژکردوەو هێشتا لەناو شۆکێکی گەورەدایە، دایکانی ئاشتی بەلەچکی سپی و دڵی پڕلەحەسرەتەوە بەگومانن لەم دۆخە، کە ئایندەکەی ڕوون نیەو نازانن بگرین یان پێبکەنن، نیگەران بن یان هەڵپەڕن.
ئەگەر شۆڕشی کورد لە باکور بکرێتە قوربانی بۆ یەپەگەو ڕۆژاڤا بەبێ فیدڕاڵیەت و هەرێمێکی سیاسی دانپێدانراو کە ئەویش گرەنتیکراونیە، ئەوە هەڵەیەکی تەئریخییەو ئاسان نیە دەرەنجامەکەی، چونکە کورد لەتورکیا دەبێتە قوربانی ململانێی توندی پارتی گەلی کۆماریی کە پارتەکەی مستەفا کەمال ئەتاتورکە لەگەڵ پارتی دادو گەشەپێدان، خستنی پارتی گەلی کۆماریی (جەهەپە) بە پشتیوانی مەتبەخی ئایدۆلۆژیی کورد لێکەوتەی خراپی دەبێت و تورکە ڕادیکاڵ و کەمالیستە نوێکان بەئاسانی قبوڵی ناکەن بەتایبەت ئەوان خۆیان بەدامەزرێنەری تورکیای مۆدێرن هەژمار دەکەن.
گرتنی ئەکرەم ئیمام ئۆغلۆ سەرۆک شارەوانی ئیستەمبوڵ لە ١٩ی ئازاری ئەمساڵ، کوردی باکوری نەخرۆشان و ناڕەزایی و کەمپەینی کوردو کاراکتەرەکانی دروست نەکرد، ئیمام ئۆغڵۆ هەمانکات کاندیدی دڵخوازی جەهەپە بوو بۆ هەڵبژاردنی سەرۆکایەتی ٢٠٢٨، ئێستا ئیتر ئەردوغان ئەگەر بەراستی دەمپارتی و ئاپۆی ئازادکراوی لەتەک بێ ئەوا بێ ڕکابەرە بۆ ئەم خولی سەرۆکایەتیەو ڕەنگە بڕیاری هەڵبژاردنی پێشوەخت بهێننە ئاراو هەندێک ئیسڵاحاتی لاوەکی و ئازادکردنی سنورداری بەشێک لەزیندانیەکان بەبێ هەمواری دەستورو بەفەرمی ناساندنی زمانی کوردیی جوڵەیەک بکەن جوڵەیەکی سادە، بێشک بەوە کە هیچ گرەنتیەکی نوسراوی نیە، دەستی کورد دەخەنە ناو تەندوری گەرمی ئاکەپە- مەهەپەو قۆناغێکی پێ بەڕێ دەکەن، بەئەگەرێکی زۆرەوە دەم پارتی دەهێننە ناو ململانێکانی دەوڵەت.
کێشەکانی دیموکراتیزەبوون لەتورکیاو مۆدێلەکانی چارەسەریی تا ئێستاش ڕوون نین لەبەردەم پرۆسەی ئاشتی، بەتایبەتی لە چوارچێوەی پرەنسیپی نەتەوەی دیموکراتیک و پرەنسیپی نیشتیمانی هاوبەش و کۆماری دیموکراتی و دەستوری دیموکراتی کە لەبەرگرینامەو مانیفێست و پەیامەکانی بەڕێز ئۆ*ج ئالاندا هاتوە، تەنانەت لە نەخشەڕێگای ٢٠٠٩ و سەردەمی پرۆسەکانی ئاشتی ئۆسلۆ تا ٢٠١١ باسکراوە تا دەگاتە گفتووگۆکانی شاندی ئیمراڵی و دەمپارتی و دەوڵەت لە کۆتاییەکانی ٢٠٢٤ تا زنجیرە دیدارەکانی ئیمراڵی و پەیامەکەی ئۆ*ج ئالان بۆ چارەسەریی و چەکدانان لە ٢٧-٢-٢٠٢٥ و ئەنجامنانەکانی کۆنگرەی دوازدەی پارتی کرێکاران.
بەڵام کێشەی کورد لەکوێ چارەسەر دەکەن و لەکام دەزگاو کام پەڕلەمان و بەکام ڕوانگەو عەقڵیەت و بیرکردنەوە؟
لەساڵی ٢٠١٧ پارتە دەسەڵاتدارەکانی تورکیا، ئاکپارتی و مەهەپە، لەڕاپرسیەکی گشتیدا بۆ هەمواری دەستووریی، بەزۆرینەی دەنگی بەدەستهاتوو ٣٣٩ دەنگ لەکۆی ٥٥٠ دەنگی پەڕلەمانتاران، ڕەگ و ڕیشەی ئەنجومەنی وەزیران و پەڕلەمانیان وەک دوو دەزگای یاسادانان و جێبەجێکردن لەبن دەرهێناو هەڵیانوەشاندەوە، بەو جۆرە سیستمی حوکمڕانی وڵاتیان لەپەڕلەمانیەوە گۆڕی بۆ سەرۆکایەتی و کۆماریی ڕەها و هەژدە مادەی گرنگیان بەدڵی سەرۆک کۆمار دەستکاری کرد، لەوڕۆژەوە سیستم سەرۆکایەتیە نەک پەڕلەمانی، نەحیزب ڕۆڵی ماوەو نە قەزاو نەدادگاو نە فراکسیۆنەکان، پەڕلەمان وەک دەزگایەکی تەشریفاتی و پەراوێزخراوی کەلتوریی ماوەتەوە، وەک فۆڕمێک بۆ شەرعیەتدان بە دەرەنجامی هەڵبژاردنەکان و هەڵبژاردنە پێشوەختەکان و بڕیارەکانی سەرۆکایەتی و باری نائاسایی.
باشە ئاوا سیستمەکە لەبنەوەڕا کرابێتە سەرۆکایەتی ڕەها، پەڕلەمان و دەزگا حکومی و قەزاییەکان ڕۆڵیان نەمابێت و بەڕێز سەرۆک کۆمار خۆی بڕیاردەربێت، چۆن دۆزگەریەکی هەستیاری وەکو کورد تەسلیمی ئەو جۆرە پەڕلەمانە دەکرێت، بەپێی کام لۆژیک کێشەکان حەواڵەی پەڕلەمان دەکەن.
خودا بەخێری بگێڕیی بۆ کوردان، هەزاران جار ئاشتی لەجەنگ باشترە