هەرێم نیوز

دۆناڵد ترەمپ، سەرۆکی ویلایەتە یەکگرتووەکانی ئەمریکا ڕایگەیاند، هێرشە ئاسمانییەکانی ساڵی ڕابردووی وڵاتەکەی گورزێکی کوشندەی لە بەرنامە ئەتۆمییەکەی تاران داوە و جەختیش دەکاتەوە کە هێنانە دەرەوەی یۆرانیۆمی پیتێنراو لەناو وێرانکەکاندا کاتێکی زۆری دەوێت.

خاپوورکردنی پێگە ئەتۆمییەکان:
دۆناڵد ترەمپ لە ڕێگەی سەکۆی "تروس سۆشیال"ەوە ئاماژەی بەوە کرد، ئۆپەراسیۆنی ناسراو بە "چەکووشی نیوەشەو" کە ساڵی ڕابردوو ئەنجامدرا، توانیویەتی پێگەکانی تۆزی ئەتۆمیی ئێران بە تەواوی خاپوور بکات. وتیشی: "بەهۆی توندیی هێرشەکان و ئەو وێرانکارییەی دروست بووە، دەرهێنان و هێنانە دەرەوەی یۆرانیۆم لەو شوێنانە پڕۆسەیەکی زۆر درێژخایەن و قورس دەبێت."

هێرش بۆ سەر میدیاکان:
سەرۆکی ئەمریکا لە هەمان پەیامیدا پەلاماری دەزگاکانی ڕاگەیاندنی وەک (CNN) و چەندین تۆڕی دیکەی هەواڵی دا و بە "گەندەڵ و درۆزن" ناوی بردن. ترەمپ میدیاکانی تۆمەتبار کرد بەوەی بەرامبەر بە فڕۆکەوانە ئەمریکییەکان دادپەروەر نین و وتی: "ئەوان هەوڵ دەدەن بایەخی کارە مەزنەکانی فڕۆکەوانەکانمان کەم بکەنەوە و پەراوێزیان بخەن."

پاشخانی ئۆپەراسیۆنەکە:
ئەم لێدوانانەی ترەمپ دوای تێپەڕبوونی ساڵێک دێت بەسەر هێرشە ئاسمانییە فراوانەکانی ئەمریکا بۆ سەر دامەزراوە ئەتۆمییەکانی ئێران، کە گرژییەکی بێوێنەی لە ناوچەکەدا دروست کرد. واشنتن پێی وایە بەو هێرشانە توانای ئێرانی بۆ گەیشتن بە چەکی ئەتۆمی بۆ چەندین ساڵ پاشەکشە پێکردووە، لە کاتێکدا تاران بەردەوام هەوڵی نۆژەنکردنەوەی پێگەکانی دەدات.