هەرێم نیوز
نیوەڕۆی ئەمڕۆ دووشەممە، ٢٣ی ئاداری ٢٠٢٦، نێچیرڤان بارزانی، سەرۆکی هەرێمی کوردستان، پەیوەندییەکی تەلەفۆنی لەلایەن تۆم بێریندسن، وەزیری دەرەوەی هۆڵەنداوە پێگەیشت. لە پەیوەندییەکەدا باس لە چەند پرسێکی گرنگی پەیوەست بە ئاسایشی ناوچەکە و پەیوەندییە دووقۆڵییەکان کرا.
سەرۆکی هەرێمی کوردستان بەبۆنەی دەستبەکاربوونی وەک وەزیری دەرەوەی هۆڵەندا، پیرۆزبایی لە تۆم بێریندسن کرد و هیوای سەرکەوتنی بۆ خواست. هەروەها نێچیرڤان بارزانی سوپاس و پێزانینی هەرێمی کوردستانی بۆ هاوکارییە بەردەوامەکانی هۆڵەندا لە هەموو قۆناغەکاندا دووپات کردەوە.
هەردوولا بیروڕایان گۆڕییەوە دەربارەی دواین پێشهاتە سەربازییەکان و تیشکیان خستە سەر چەند خاڵێکی هەستیار:
• مەترسییەکانی شەڕ: جەخت کرایەوە لەسەر لێکەوتە مەترسیدارەکانی شەڕ لەسەر ئارامی، سەقامگیری و دۆخی ئابووریی ناوچەکە و جیهان.
• چارەسەری ئاشتییانە: هەردوولا هاوڕا بوون کە پێویستە هەموو هەوڵێک بۆ ڕاگرتنی شەڕ و چارەسەرکردنی ناکۆکییەکان بە ڕێگەی ئاشتییانە بخرێتە گەڕ.
وەزیری دەرەوەی هۆڵەندا نیگەرانیی وڵاتەکەی و یەکێتیی ئەوروپای دەربڕی سەبارەت بە ئەگەری فراوانبوونی زیاتری ململانێکان. هەروەها جەختی لەسەر پشتگیریی هۆڵەندا بۆ پاراستنی ئارامی و سەقامگیریی عێراق و هەرێمی کوردستان کردەوە.
تەوەرێکی دیکەی گفتوگۆکە تایبەت بوو بە:
• دوورخستنەوەی عێراق لە شەڕ: گرنگیی پاراستنی عێراق و هەرێمی کوردستان لە لێکەوتەکانی ململانێی هێزە ناوچەییەکان.
• هەماهەنگیی هاوبەش: تاوتوێکردنی پەیوەندییەکانی هەولێر و بەغدا و پەرەپێدانی هاریکارییەکانی نێوان هەرێمی کوردستان و هۆڵەندا.