هەرێم نیوز
وەزیری کاروباری ڕۆژهەڵاتی ناوەڕاست لە وەزارەتی دەرەوەی بەریتانیا و سەرۆکی ئەنجوومەنی باڵای دادوەریی عێراق جەختیان لە دوورخستنەوەی عێراق لە جەنگ و ئاڵۆزییەکانی ناوچەکە کردەوە.
ئەمڕۆ هەینی 20ی ئاداری 2026 وەزارەتی دەرەوە و گەشەپێدانی بەریتانیا بەیاننامەیەکی فەرمیی لەسەر پەیوەندییەکی تەلەفۆنیی نێوان بەرپرسانی هەردوو وڵات بڵاوکردەوە.
بەپێی بەیاننامەکە هیمش فۆڵکنەر وەزیری کاروباری ڕۆژهەڵاتی ناوەڕاستی بەریتانیا پەیوەندییەکی لەگەڵ دادوەر فایەق زێدان سەرۆکی ئەنجوومەنی باڵای دادوەریی عێراق ئەنجام داوە.
لە میانی ئەم پەیوەندییەدا هەردوو بەرپرسەکە بەوردی گفتوگۆیان لەسەر بارودۆخی مەترسیدار و جەنگی ئێستای ڕۆژهەڵاتی ناوەڕاست کردووە.
وەزیرەکەی بەریتانیا جەختی لە پێویستییەکی زۆر بەپەلە کردووەتەوە بۆ ئەوەی سەرجەم لایەنەکان لە ناوخۆی عێراقدا کار بۆ ڕێگریکردن لە پەرەسەندنی زیاتری ئاڵۆزییەکان بکەن.
هەروەها ئاماژەی بەوە کردووە کە دەبێت هەموو هەوڵێک بدرێت بۆ ئەوەی عێراق بەتەواوی لەم ململانێ و جەنگەی ناوچەکە دوور بخرێتەوە.
لە بەشێکی دیکەی بەیاننامەکەدا هاتووە کە هەردوو لا باسیان لە گرنگیی بەردەوامبوونی پەیوەندییەکانی نێوان بەغدا و لەندەن کردووە.
لە کۆتاییشدا وەزیری کاروباری ڕۆژهەڵاتی ناوەڕاستی بەریتانیا دووپاتی کردووەتەوە کە هاوکاریی نێوان هەردوو وڵات بۆ پاراستنی ئاسایشیان زۆر پێویست و حەتمییە.