هەرێم نیوز
جان نوێل بارۆت، وەزیری دەرەوەی فەڕەنسا، ڕایگەیاند کە وڵاتەکەی بە فەرمی گەرەنتی سیاسی و ئەمنی بۆ جێبەجێکردنی ڕێککەوتنی نێوان ئیدارەی خۆسەر و حکومەتی سووریا دەدات. ئەم ڕێککەوتنە وەک بەرهەمی "دیپلۆماسیەتی چڕی فەڕەنسا" و ئیمانوێل ماکرۆن وەسف کرا.
وەزیری دەرەوەی فەڕەنسا لە پەیامێکدا لە هەژماری فەرمیی خۆی لە (ئێکس) نووسیویەتی: "ئەم ڕێککەوتنە گەرەنتی سیاسی و ئەمنی بۆ هاوبەشە کوردەکانمان لە شەڕی داعش دابین دەکات." ئاماژەی بەوەش کرد کە فەڕەنسا بەردەوام دەبێت لە پاڵپشتیکردنی کوردەکان لە چوارچێوەی ئەم قۆناغە نوێیەدا.
وەزیرە فەڕەنسییەکە تیشکی خستە سەر سێ خاڵی سەرەکی کە فەڕەنسا وەک گەرەنتییکەر چاودێرییان دەکات:
• تێکەڵکردنی سەربازی: هێزە کوردییەکان دەبنە بەشێک لە سوپای سووریا بە شێوازێکی فەرمی.
• ئیدارەی مەدەنی: دانپێدانان بە دامەزراوەکانی ئیدارەی خۆسەر لە ناوچەکەدا.
• مافە نەتەوەییەکان: دانپێدانانی فەرمی بە مافەکانی گەلی کورد لە سووریا.
جان نوێل بارۆت جەختی کردەوە کە ئەم هەنگاوە تەنها بۆ پاراستنی کورد نییە، بەڵکو "هەنگاوێکی گەورەیە بۆ سەقامگیریی سووریا و بەردەوامیی شەڕی هاوبەشی دژ بە داعش." پاریس دووپاتی کردەوە کە لەم پڕۆسەیەدا لە تەنیشت هەموو سوورییەکان دەمێنێتەوە بۆ ڕێگریکردن لە هەر پشێوییەکی نوێ.
ئەم لێدوانەی وەزیری دەرەوەی فەڕەنسا دوای ئەوە دێت کە ئیلهام ئەحمەد ئاشکرای کردبوو سەرۆک ماکرۆن ڕاستەوخۆ لە ناو دیالۆگەکاندا بووە. فەڕەنسا وەک یەکێک لە نزیکترین هاوپەیمانە نێودەوڵەتییەکانی کورد لە سووریا، دەیەوێت دڵنیایی بداتە هەسەدە کە گەڕانەوە بۆ ناو سوپای سووریا بە واتای توانەوە و لەدەستدانی دەستکەوتەکان نایەت.
