هەرێم نیوز
دابەشکردنی مووچەی مانگی نۆ دەستیپێکرد و بەرپرسێکی بانکیش لە هەولێر دەڵێتم، فەرمانیان بۆ بێت دەوام درێژ دەکەنەوە.
بەپێی خشتەی وەزارەتی دارایی، ئەمڕۆ یەكشەممە، مووچەی خانەنشینانی شارستانی و پێشمەرگە، كەسوكاری شەهیدان و ئەنفالكراوان، زیندانییانی سیاسی، لەگەڵ وەزارەتەكانی كاروباری شەهیدان، پەروەردە و تەندروستی و خوێندنی باڵا دابەش دەکرێت.
محەمەد مەلا، بەڕێوەبەری بانکی حەمرین لە هەولێر بە میدیای پارتی ڕاگەیاند، “ئێمە لەدوای نیوەڕۆ دەست بە دابەشكردنی مووچە دەكەین، فەرمانمان بۆ بێت لە دارایی دابەشكرنی مووچە درێژ دەكەینەوە”.
لە چەند رۆژی ڕابردوو، وەزارەتی دارایی هەرێم بڵاویكردەوە ئەو خانەنشین و مووچەخۆرانەی كارتی (هەژماری من)یان پڕ نەكردووەتەوە، مووچەی مانگی نۆیان رادەگیرێت.
بەڕێوەبەری بانکی حەمرین جەختی كردەوە: “ئەوەی فۆڕمی (هەژماری من)ی پڕ نەكردبێەوە، مووچەكەی خەرج ناكرێت”.
سیروان محەمەد، بەڕێوەبەری بانكی كێوەرەش لە ئیدارەی سەربەخۆی راپەڕین وتی: “دوای نیوەڕۆ دەست بە دابەشكردنی مووچە دەكەین و ئەوەی فریا نەكەوت، دەتوانێت سبەینێ دووشەممە سەردانمان بكات”.
لای خۆیەوە تیمی (هەژماری من) رایگەیاند، ئەمڕۆ ئێوارە لە رێگەی ئامێرەكانی راكێشانی پارە مووچەی خانەنشیان و چەند وەزارەتێك دەدرێت و بە نامەش ئاگادار دەكرێنەوە، داواش دەکەین تا ئاگاداریان نەكەینەوە، مووچەخۆران نەچنە لای ئامێرەكانی راكێشانی پارە.