هەرێم نیوز
سەرۆکوەزیرانی عێراق
واشنتنی بەرەو بەغدا بەجێهێشت و سەردانەکەی بۆ واشنتن بە ''سەرکەوتوو'' ناودەبات و
دەڵێت، لەگەڵ ئەمریکا لە بواری ئابووری و سیاسی و رۆشنبیری لێکتێگەیشتنمان هەبووە.
مستەفا کازمی، سەرۆکوەزیرانی
عێراق لە تویتێکدا رایگەیاند "واشنتنمان بەرەو بەغدای خۆشەویست بەجێهێشت، پاش
سەردانێکی سەرکەوتوو و لێکتێگەیشتن لە بواری ئابووری و سیاسی و رۆشنبیری."
سەرۆکوەزیرانی عێراق
هەروەها دەڵێت، رێککەوتن کراوە بۆ گۆڕینی پەیوەندی ئەمنی بۆ راهێنان و راوێژی ئەمریکا
لە بواری سەربازییدا، بێ بوونی هێزی شەڕکەر لە کۆتایی ساڵدا.
لە بەشێکی دیکە
توویتەکەیدا کازمی ئاماژە بەوە دەدات "هەوڵی بەهێزکردنی هاوئاهەنگی کۆمەڵایەتیی
و سیاسی دەدەین لە پێناو بەرژەوەندی گەلەکەمان، ئەویش بە پەیوەندی بەردەوام لەگەڵ
سەرۆکی ئەمریکا و بەردەوامی هاوکاری و گفتوگۆ لەگەڵ ئەمریکا."
کازمی دوو رۆژ لەمەوبەر
لەگەڵ جۆ بایدن، سەرۆکی ئەمریکا کۆبووەوە و دواتر رایگەیاند "رێککەوتن کراوە
کۆتایی ساڵ هێزی شەڕکەری ئەمریکا لە عێراق نەمێنێت."
ماوەی چەند رۆژێک
بوو شاندێکی عێراقی بە مەبەستی گفتوگۆ لەبارەی کشانەوەی هێزە شەڕکەرەکانی ئەمریکا
لە عێراق و چەند تەوەرێکی دیکە بە سەرۆکایەتیی مستەفا کازمی، سەرۆکوەزیرانی عێراق
لە ئەمریکابوون.
رۆژی دووشەممە
26-07-2021 گەڕی چوارەمی دانوستاندنی ستراتیژیی نێوان عێراق و ویلایەتە یەکگرتووەکانی
ئەمریکا بەڕێوەچوو، لە راگەیەندراوی وەزارەتی دەرەوەی عێراق لەبارەی کۆبوونەوەکە
هاتووە، هەردوو وڵات و توێژەکانیان لە رێگەی لیژنەی هاوئاهەنگی پەیوەست بە رێكکەوتننامەی
ستراتیژی درێژەپێدەدەن، هەروەها تێیدا هاتووە کە ئەمریکا رێزگرتنی بۆ سەروەریی عێراق
و یاساکانی عێراق دووپاتکردووەتەوە و بەڵێنی بە دابینکردنی ئەو یارمەتیانە داوە کە
عێراق پێویستی پێیانە.