بەدیاریکراوی بیست و دوو ساڵە چاودێری کەناڵە عەرەبی و فەڵەستینییەکان ئەکەم ، ڕۆژانە گۆڤارو ڕۆژنامە بەناوبانگەکانیان دەخوێنمەوە ، شەوانە بەدیار کەناڵە ئاسمانییەکانیانەوە دادەنیشم، هەتا ئەمڕۆ ڕۆژنامەیەکی عەربی و فەڵەستینیم نەدی بەدێڕێکیش باسی کورد بکەن ،هەتا ئەمڕۆ لەبەرنامەیەکی تەلەفزێۆنیدا سیاسیەک ، ڕۆشنبیرێک ، مەلایەک ، نووسەرێک، ڕۆژنامەنووسێکی عەرەبی و فەڵەستینیم نەدی بە وشەیەکیش باسی ئازارەکانی کورد بکات ، من هەتا ئەمڕۆ نەمبیستوەو نەمبینیوەو نەمخوێندۆتەوە، ئەگەر تۆ خوێندوتەتەوە، ئەگەر تۆ بەرچاوت کەوتووە، فەرموو نموونەیەکم پێ بڵێ،نموونەیەکی زۆر سادە!!
سەرنج بدەن لەدوای پڕۆسەی قڕکردنی بارزانییەکان و گەرمیانییەکان لە ساڵی 1980_ 1988تاکو ئەمڕۆ
لەدوای کیمیابارانکرنی هەڵەبجەو بادینان وبالیسان و قەرەداغ لەساڵی 1974 _1988، تاکو ئەمڕۆ
لەدوای وێرانکردنی گوندەکانی کوردستان لەساڵی 1980 _1988 تاکو ئەمڕۆ
لەدوای کۆڕەی ملێۆنی کورد لە ساڵی 1991 تاکو ئەمڕۆ 
فەرموون پێم بڵێن لە چ کەناڵێکی عەرەبیی و فەڵەستینیەوە !!
لەچ ڕۆژنامەیەکی عەرەبی و فەڵەستینیەوە !!
لە چ ڕادێۆیەکی عەرەبی و فڵەستینییەوە، بە یەک وشە،بە دێڕێک باسی ئەو هەمووە ئازارەی کورد کراوە ؟! لەچ وڵانێکی عەرەبییەوە ،لەچ ڕێکخراوێکی خێرخوازی عەرەبی و فەڵەستینییەوە، دینارێک ،درهەمێک ،ڕیاڵێک بۆ مناڵێکی کورد بردراوە ؟!!
ئەگەر تا رووخانی سەدامی گۆڕبەگۆر نەیانوێراوە باسی ئەو هەمووە کارەسات وماڵوێرانییەی کورد بکەن، خۆ ئەوە 22 ساڵە سەدام و ڕژێمەکەی گۆڕبەگۆڕ بوون،!بۆچی هێشتا ئامادەنین بەدێڕێک،بەوشەیەک باسی ئازارەکانی کورد بکەن؟!!
کەچی هەر لەو بیست و دوو ساڵەدا ،ئەوەی لە باشووری کوردستان خوێندوومەتەوەو بینیومە، 180 پلە پێچەوانە بووە ، زۆربەی زۆری میدیاو ڕۆژنامەنووس و ڕادێۆو ڕۆژنامەو پەیجە کوردییەکان، زۆربەی زۆری کەسایەتییە سیاسی و کۆمەڵایەتی و ئاینییەکان ، زۆربەی حیزب وتاقم وگرووپ و ڕێکخراوە کوردییەکان، باسی مێژووی عەرەب و جوگرافیای عەرەب و سەرکردەی عەرەب و شەڕی عەرەب و ئازاری عەرەب و فەڵەستینیەکان ئەکەن، هەمووان باسی ئازایەتی عەرەب و پاڵەوانە کارتۆنییەکانی عەرەب و فەڵەستین دەکەن، هەمووان عەرەب و فەڵەستینیەکان بە براو پشت و پەنای خۆیان دەزانن!
ئاخر هەتا کەی بیر ناکەیتەوە ؟!