هەرێم نیوز
نێچیرڤان بارزانی، سەرۆکی هەرێمی کوردستان، بە فەرمی پەیامێکی پیرۆزبایی ئاڕاستەی کۆمەڵی دادگەریی کوردستان کرد و تێیدا جەختی لە گرنگیی پێگەی هێز و لایەنە سیاسییەکان و پێکهاتەکانی کوردستان کردەوە بۆ چەسپاندنی لێکگەیشتن و هێنانەکایەی یەکڕیزیی نیشتمانی لەم قۆناغەدا.
پەیامی پیرۆزبایی بۆ عەلی باپیر و سەرکردایەتیی کۆمەڵ
ئەمڕۆ یەکشەممە (٣١ی ئایاری ٢٠٢٦)، نێچیرڤان بارزانی، سەرۆکی هەرێمی کوردستان، بە بۆنەی ساڵیادی دامەزراندنی کۆمەڵی دادگەریی کوردستانەوە ڕاگەیەندراوێکی بڵاوکردەوە و ڕایگەیاند: "ساڵیادی دامەزراندنی کۆمەڵی دادگەریی کوردستان، لە مامۆستا عەلی باپیر، سەرۆکی کۆمەڵ، سەرکردایەتی، ئەندامان و تەواوی جەماوەری کۆمەڵی دادگەریی کوردستان پیرۆز دەکەم و هیوای سەرکەوتنیان بۆ دەخوازم لە کار و تێکۆشانیاندا."
کارکردنی پێکەوەیی لە پێناو بەرژەوەندییە باڵاکان
سەرۆکی هەرێمی کوردستان لە بەشێکی دیکەی پەیامەکەیدا، ئاماژەی بە پێویستیی قۆناغی ئێستای هەرێمی کوردستان کرد لە ڕووی سیاسییەوە و گوتی: "لەم یادەدا، جەخت لە گرنگیی پێگەی هێز و لایەنە سیاسییەکان و پێکهاتەکانی کوردستان بۆ چەسپاندنی لێکگەیشتن و یەکڕیزیی نیشتمانی دەکەمەوە."
نێچیرڤان بارزانی لە کۆتایی پەیامەکەیدا ڕوونی کردەوە، کە ئەم یەکڕیزی و لێکگەیشتنە تەنها لە پێناو پاراستنی بەرژەوەندییە باڵاکانی گەلەکەمان و چەسپاندنی پرەنسیپی کارکردنی پێکەوەییدایە، تاوەکو هەمووان پێکەوە بەرەو داهاتوویەکی گەشتر، ئارامتر و سەقامگیرتر بۆ هەرێمی کوردستان هەنگاو بنێین.