هەرێم نیوز

لە هەنگاوێکی دیپلۆماسیی نوێدا بۆ چەسپاندنی تەبایی نێوان پێکهاتەکان، ئەحمەد شەرع، لە کۆشکی گەل پێشوازی لە شاندێکی فراوانی پێکهاتەی کوردی سووریا کرد، ئەمەش وەک ئاماژەیەک بۆ گۆڕانکاری لە مامەڵەی دەوڵەت لەگەڵ دۆسیەی کورددا.

سەرۆکایەتیی کۆماری سووریا لە ڕاگەیەندراوێکدا ئاشکرای کرد کە دیدارەکە بەبۆنەی جەژنی ڕەمەزانی پیرۆز و جەژنی نەورۆزەوە بووە. لە کۆبوونەوەکەدا کە پارێزگارەکانی (حەلەب، ڕەققە و حەسەکە) ئامادەی بوون، ئەحمەد شەرع جەختی لە چەند خاڵێکی سەرەکی کردەوە:
• نەورۆز جەژنێکی گشتگیرە: شەرع ڕایگەیاند کە نەورۆز تەنها جەژنی پێکهاتەیەک نییە، بەڵکو "جەژنێکی نیشتمانییە" و ڕەنگدانەوەی تایبەتمەندیی کولتووریی کوردە لەناو چوارچێوەی سووریای یەکگرتوودا.
• مافە ڕەسەنەکان: دووپاتی کردەوە کە دابینکردنی مافەکانی هاووڵاتیانی کورد "مافێکی ڕەسەن و بێ ئەملاولا"یە و فرەچەشنیی کولتووری سەرچاوەی هێزی سووریایە.

شاندە کوردییەکە لە دیدارەکەدا ستایشی مەرسوومە نوێیەکانی سەرۆکایەتییان کرد کە تایبەت بوون بە گەرەنتییکردنی مافە نەتەوەیی و مەدەنییەکانی کورد. هەردوولا جەختیان لەسەر ئەم خاڵانە کردەوە:

1. یەکڕیزیی نیشتمانی: پاراستنی خاکی سووریا و قووڵکردنەوەی برایەتی نێوان پێکهاتەکان.
2. کۆتاییهێنان بە دیاردەی چەکداری: جەختکردنەوە لەسەر گرنگیی سنووردارکردنی چەک تەنها لە دەستی دەوڵەت و دامەزراوە فەرمییەکاندا.