بەڵگەنامەیەکی ئەنجومەنی نوێنەرانی ئەمریکا دەربارەی یاسای بودجەی بەرگری، داوا لە وەزیری بەرگری (پیتەر هیگسیت) دەکات کە سزای دارایی بخاتە سەر هەر بڕە پارەیەک کە بۆ عێراق تەرخان دەکرێت لە بودجەی ساڵی ٢٠٢٦. ئەم سنووردارکردنە دەمێنێتەوە، مەگەر حکومەتی عێراق کاریگەریی گرووپە چەکدارەکان، بە تایبەت ئەوانەی نزیکن لە ئێران وەک ڕێکخراوی بەدر بە سەرۆکایەتی هادی عامری، کەم بکاتەوە.
لە بڕگەی ١٢٢٨دا، ئەم ڕاپۆرتە ڕێگە بە کەمکردنەوەی تا ٧٥%ی بودجەی هێزە ئەمنییەکانی عێراق دەدات، تا ئەو کاتەی وەزیری بەرگری ئەمریکا بە لیژنە سەربازییەکانی کۆنگرێس ڕادەگەیەنێت کە حکومەتی عێراق هەنگاوی ڕاستەقینەی ناوە.
ڕاپۆرتەکە، دەڵێت ئەم هەنگاوە ڕاستەقینانە بریتین لە: کەمکردنەوەی توانای شەڕکردنی میلیشیا پەیوەستەکان بە ئێرانەوە، لە ڕێگەی چەکداماڵینێکی ئاشکرا و گەڕاندنەوەی چەکدارەکان بۆ ژیانی ئاسایی. هەروەها، بەهێزکردنی دەسەڵاتی سەرۆکوەزیرانی عێراق وەک سەرۆکی گشتیی سوپا و هێزە ئەمنییەکان. لەگەڵ لێکۆڵینەوە و سزادانی ئەندامانی ئەو میلیشیایانە یان ئەو ئەندامانەی هێزی ئەمنی کە بە بێ فەرمانی سەرەوە کار دەکەن و هێرش دەکەنە سەر ئەمریکی یان عێراقییەکان، یان بە شێوەیەکی نایاسایی و تێکدەرانە کار دەکەن.
بڕگەی ١٢٢٧ باس لە قەدەغەکردنی تەرخانکردنی پارە بۆ ڕێکخراوی بەدر دەکات. ڕوونیدەکاتەوە کە هیچ بڕە پارەیەکی مۆڵەتپێدراو، لەوانەش هی وەزارەتی بەرگری ئەمریکا بۆ ساڵی ٢٠٢٦، نابێت بدرێتە ڕێکخراوی بەدر یان هیچ ڕێکخراوێکی تر کە دەزگای هەواڵگریی وەزارەتی بەرگری وەک درێژکراوە یان جێگرەوەی بەدر دایدەنێت.
ڕاپۆرتەکە ئاماژەی بەوەدا کە وەزیری بەرگری دەتوانێت ئەو سنووردارکردنانە بۆ ماوەی ١٨٠ ڕۆژ هەڵبگرێت، ئەگەر ئەمە لە بەرژەوەندیی نیشتمانیی ئەمریکا بێت. ئەمەش بە داواکارییەکی نووسراو دەبێت کە پێشکەش بە لیژنەکانی کۆنگرێس دەکرێت و هۆکار و شێوازی کارکردنی بۆ گەیشتن بە ئامانجەکان لەخۆ دەگرێت.
ڕاپۆرتەکە باسی لەوەش کرد کە ئەم ڕێوشوێنانە بۆ ئەو بڕە پارانە جێبەجێ ناکرێن کە لەناو بودجەی هێزە ئەمنییەکانی عێراقدا بۆ هێزەکانی پێشمەرگە دیاریکراون.
ڕاپۆرتەکە داوا دەکات کە وەزیری بەرگری دەبێت تا ٣١ی ئاداری ٢٠٢٦، ڕاپۆرتێک لەسەر دۆخی زیندانەکانی سوریا بۆ گیراوەکانی داعش پێشکەش بکات کە لەژێر پارێزگاریی هێزەکانی سوریای دیموکراتدان. دەبێت ئەم ڕاپۆرتە دۆخی ژیان لەو زیندانانە، پلانە درێژخایەنەکانی پاراستنیان، ژمارەی مەزەندەکراوی گیراوەکان، و هەوڵەکانی وەزارەتی بەرگری بۆ گەڕاندنەوەی ئەو گیراوانە بۆ وڵاتی خۆیان یان وڵاتێکی تر، بە هاوکاری لەگەڵ لایەنە ناوخۆیی و نێودەوڵەتییەکان، بگرێتەوە.
دەربارەی هێزەکانی ئەمریکا لە سوریا، ڕاپۆرتەکە ڕوونیکردەوە کە پێویستە لەسەر وەزیری بەرگری، بە هەماهەنگی لەگەڵ فەرماندەیی ناوەندی ئەمریکا، لە ماوەی ١٢٠ ڕۆژدا دوای پەسەندکردنی ئەم یاسایە، ڕاپۆرتێک پێشکەش بکات. ئەم ڕاپۆرتە دەربارەی دۆخ و شوێن و چالاکییەکانی هێزەکانی ئەمریکایە لە سوریا، ئایا گەیشتوونەتە ئامانجەکانیان یان نا، و چۆن لەگەڵ هێزەکانی حکومەتی سوریا و هاوپەیمانانی دیکە کار دەکەن بۆ شەڕی دژی داعش.
هەروەها، پێویستە دیاری بکرێت کە هێزەکانی ئەمریکا لە سوریا چۆن ڕۆڵ دەگێڕن لە ترساندن و ڕێگریکردن لە ئێران و گرووپە وابەستەکانی، لەوانەش هێزی قودسی سەر بە سوپای پاسداران و ئەو گرووپانەی لە سوریا کار دەکەن.
ڕاپۆرتەکە داوا دەکات دیاری بکرێت کە هێزەکانی ئەمریکا چۆن یارمەتی هێزەکانی سوریای دیموکرات و خەڵکی تر دەدەن بۆ پاراستنی سەقامگیری و ئاسایش لە کاتی پێکهێنانی حکومەتێکی نوێی سوریا کە نوێنەرایەتیی هەموو لایەنێک بکات و مافەکانی کەمینەکان بپارێزێت.
بەپێی ڕاپۆرتەکە، وەزارەتی بەرگری دەبێت ڕوون بکاتەوە چۆن بەشدار دەبێت لە ڕێگریکردن لە ناسەقامگیری کە لەوانەیە لە سوریاوە بڵاوبێتەوە و ببێتە هەڕەشە بۆ سەر ئەمریکا، هاوپەیمانان و شەریکەکانی، لەوانەش ئیسرائیل.
هەروەها دەبێت وەسفی هەر گۆڕانکارییەکی ئەگەری لە دۆخی هێزەکانی ئەمریکا لە سوریا و کاریگەرییە پێشبینیکراوەکانی ئەو گۆڕانکارییە لەسەر هاوکاریی ئەمریکا لەگەڵ هێزە هاوبەشەکانی لە سوریا بکات.