هەرێم نیوز
پارتی ژیانی ئازادی كوردستان "پژاك" رەتیكردەوە ئەو سێ گەنجەی لە قەزای ماوەت بێسەروشوێن بوون لای ئەوان بن و جەخت لەوە دەكەنەوە، ئەو دەنگۆیانەی بڵاوكراونەتەوە دوورن لە راستییەوە.

 
پژاك لە رونكردنەوەیەكدا رایگەیاندووە، بە داخ و پەژارەیێكی زۆرەوە سێ گەنجی ناوچەی شارباژێڕ بە مەبەستی گەشت و سەیران دەچنە سەر چەمی خەمەڵۆكە، بەڵام ئەكەونە ناو ئاوەكە و تاوەكو ئێستاش نەدۆزراونەوە، ئەم كارەساتە هاوخەمی خانەوادە و كەسوكاری ئەو گەنجانەن و هیوادارن دوایین خەم و ناخۆشییان بێت.

ئەوەش هاتووە، لە رۆژی یەكەمی رووداوەكە بەئەركی خۆیان زانیوە و لەگەڵ لایەنە پەیوەندیدارەكان لەسەر خەت بوون بە مەبەستی هاوكاری پێویست بۆ گەڕان و دۆزینەوەی تەرمی ئەو گەنجانە، بە هێزەكانی خۆیان راگەیاندووە كە یارمەتیدەربن و بە دۆزینەوەی بچوكترین سەرەداو لایەنە پەیوەندیدارەكان ئاگادار بكەنەوە.

پژاك جەختی لەوەش كردووەتەوە، هەندێك لایەن بەمەبەستی تەشهیركردن و ناو زڕاندان و رەشكردنی پژاك لە ناوچەكە دەستیان داوەتە بڵاوكردنەوەی هەواڵی دوور لە راستی و ئەخلاق و ئینسانیەت و بەو كارەشیان بە هەستی خانەوادە و كەسوكاری ئەو گەنجانە یاری دەكەن و زۆر بە نائەخلاقی رای كۆمەڵگا بە ئاڕاستەیەكی خراپدا دەبەن، ئەو كەسانە لای ئەوان نین و ئەو دەنگۆیانە دوورن لە راستی و هیچ بنەمایەكیان نییە.