هەرێم نیوز
وەزارەتی سامانە سروشتییەكان ڕایگه‌یاند، پێشنیوه‌ڕۆی ئه‌مڕۆ جارێكی دیكە لە ڕێگەی درۆنی بۆمبڕێژكراو هێرش كرایە سەر كێڵگەی نەوتی DNO لە تاوكێ لە سنوری ئیدارەی سەربەخۆی زاخۆ، هێرشەكە زیانی گیانی و ماددیی لێنەكەوتوەتەوە.
وەزارەتی سامانە سروشتییەكانی حكومه‌تی هه‌رێمی كوردستان له ڕاگه‌یه‌ندراوێكدا باسی له‌وه‌كردوه، "ئەمڕۆ بۆ جارێكی دیكە كاتژمێر 10:55 لە ڕێگەی درۆنی بۆمبڕێژكراو هێرشكرایە سەر كێڵگەی نەوتی DNO لە تاوكێ لە سنوری ئیدارەی سەربەخۆی زاخۆ، هێرشەكە زیانی گیانی و ماددیی لێنەكەوتوەتەوە".
ئاماژه‌ی به‌وه‌شكردوه، ئەو جۆرە هێرشانە بۆ سەر ژێرخانی ئابوریی هەرێمی كوردستان بە توندی سه‌ركۆنه و شەرمەزار دەكات و چەند جارێكیش داوای لە حكومەتی فیدراڵی و كۆمەڵگەی نێودەوڵەتیی كردوە بۆ پاراستنی گیانی هاووڵاتییانی نزیك بەم ناوچانە و گیانی كارمەندانی مەدەنیی بپارێزن و ڕێگری لە هێرشەكان بۆ سەر هەرێمی كوردستان و كەرتی وزە بکەن.
ئەمەش لەکاتێکدایە، لەم مانگەدا نزیکەی 18 هێرشی درۆنی کراون و نیوەی زیاتر لەو هێرشانە، بۆ سەر کێڵگەکانی نەوت بوون، کە چواریان ڕۆژی ١٦-٧ کرانە سەر کێڵگە نەوتییەکانی سنووری پارێزگای دهۆک. لەنێویاندا دوو کێڵگە کە لەلایەن کۆمپانیا ئەمریکییەکانەوە بەڕێوەدەبرێن.