هەرێم نیوز
تەندروستی گەرمیان لە راگەیەندراوێکدا کە بڵاویکردووەتەوە، دوو حاڵەتی تووشبوون بە کۆلێرا لە سنورەکەیان تۆمارکراوە. داوا لە هاوڵاتیان دەکەن رێکارەکانی خۆپارێزیی جێبەجێ بکەن.
لە راگەیەندراوەکەی تەندروستی گەرمیان ئاماژە بە ڕێکارەکانی خۆپارێزیی لە نەخۆشیەکە کراوە لەوانە: "راگرتنی پاکوخاوێنی کەسیی، دڵنیابوونەوە لە پاکیی سەرچاوەی ئاو، ئاگاداربوون لە خواردنی سەوزە و میوە و باش شۆردنەوەیان پێش خواردنیان، خۆدوورگرتن لە خواردنی دەرەوە و سەردانەپۆشراو.
داواش لە هاووڵاتیانیش دەکەن، لەکاتی بوونی حاڵەتی سکچوونی توند، سەردانی نەخۆشخانە بکەن.
هاوکات تیمەکانی تەندروستی بە بەردەوامیی لە ئەرکدا دەبن و پشکنین بۆ سەرچاوەی ئاو و شوێنکار و خواردنگە و جێگە گومانلێکراوەکان دەکەن، بەمەبەستی دڵنیابوونەوە لە بڵاونەبوونەوەی نەخۆشییەکە".
نیشانەکان:
- سکچوونی ئاوی توند
- ڕشانەوە
- گرژبوونی ماسولکەکان
- وشکبوونەوەی لەش (ووشکبوونەوەی دەم، تینوێتی زۆر، سەرگێژخواردن)
کێ زۆرترین مەترسی لەسەرە؟
ئەو کەسانەی لەو ناوچانە دەژین کە پاکوخاوێنییان خراپە و دەستڕاگەیشتن بە ئاوی پاک سنووردارە، زۆرترین مەترسی تووشبوونیان بە نەخۆشی کۆلێرا هەیە. هەروەها گەشتیارانی ئەو ناوچانەش مەترسییان لەسەرە و پێویستە ئاگاداری خۆیان بن.
خۆپاراستن:
- زوو زوو دەستەکانت بە ئاو و سابون بشۆ، بەتایبەت دوای بەکارهێنانی تەوالێت و پێش خواردن.
- تەنها ئاوی پاک بخۆرەوە. ئەگەر دڵنیا نەبوویت لە سەرچاوەی ئاوەکە، بەلایەنی کەمەوە بۆ ماوەی یەک خولەک بیکوڵێنە.
- تەنها خواردنی تەواو کوڵاو و گەرم بخۆ.
- پێش خواردنی میوە و سەوزە توێکڵەکەی لێبکەرەوە.
وەزارەتی تەندروستی ئاماژەی بەوەشداوە، کۆلێرا نەخۆشییەکە کە چارەسەر دەکرێت و دەستنیشانکردنی پێشوەختە زۆر گرنگە بۆ ڕێگریکردن لە ئاڵۆزییەکان. ئەگەر هەستت بە نیشانەکانی نەخۆشی کۆلێرا کرد، دەستبەجێ سەردانی پزیشکی پسپۆڕ بکە. چارەسەرکردن دوا مەخە، چونکە وشکبوونی لەش بە خێرایی دەبێتە مەترسی لەسەر ژیان.