مێژوونوسی گەورە و ناوداری كورد (پ.د. كەمال مەزهەر ئەحمەد)، موحتاجی ستایشكردن و پیاهەڵدان و ناوهێنان نییە، بەڵام ئەو هەوڵەی ئەو لەماوەی زیاتر لەنیوو دانە سەدەدا، لەبواری نوسینەوەی مێژووی هاوچەرخی كورددا بەخەرجیدا، بەزمانی (كوردی و عەرەبی و ڕوسی و ئینگلیزی)و ئەو ئەرشیف دۆزییەی شێلگیرانە ئەنجامیدا، سەبارەت بەدەست ڕاگەیشتنی بەچەند ڕاستیەك دەربارەی دۆزی نەتەوەكەی، جێگەی ڕێز و تەقدیر و پێزانینەو دەبێت باس بكرێت و بەفەرامۆشی نەسپێردرێت.
بایی ئەوە بەرهەمی مێژوویی گرنگی بۆ جێهێشتووین، تاكاری پێویستیان لەسەربكرێت و سودیان لێببینرێت.
ڕاستە بەپێودانگەكانی مێژوونووسیی تازەو بەو بەرەو پێشچوونە زۆرەی كایەی مێژووناسی و نوسینەوەی مێژوو بەخۆیەوە بینیووە (بەتایبەت ئەو شۆڕشە گەورەیەی قوتابخانەی ئەناڵی فەرەنسی، بەڕێبەرایەتی مارك بلۆخ و لوسیان ڤیڤەر و فێرنان برۆدێل بەرپایانكرد)،
د. كەمال مەزهەر مێژوونووسێكی تەقلیدیەو زیاتر سەروكاری لەگەڵ سەردو گێڕانەوە و ساغكردنەوەی بەڵگە نامەكاندا هەیەو لە دیدگای ئەوەوە، مێژوو ئەو بوارەیە كەخۆی بەڕاستی و دروستی زانیاریەكانمان دەربارەی ڕابردووەوە خەریك دەكات، بەڵام لەگەڵ ئەوانەشدا لەسەدەی بیستەمداو بەراورد بەهاوتەمەن و هاوپیشەكانی خۆی، بەو جۆرەی تێیگەیشتووەو دەستی بەسەردا شكاوە، توانیویەتی وەك مێژوونووسێك، گەورەترین خزمەت بكات و كەلێنێكی گەورە لەكتێبخانەی كوردیدا پڕ بكاتەوە.
كتێبی (د.كەمال مەزهەر - ژیان و بەرهەم و ڕێبازی لەنووسینەوەی مێژوودا، چاپی یەكەم - هەولێر، 2018 -104 لاپەڕە)، هەوڵێكە بۆ ڕێزگرتن لەهەوڵ و ماندوبوون و بەرهەمەكانی شێخی مێژوونوسانی كورد و جێگەی دەست خۆشیە، بەڵام لەکەموكوڕیش بەدەرنیە:
یەكەم - لەكتێبەكەدا هیچ سەرنج و بۆچون و دیدگایەكی ڕەخنەیی نابینین، لەكۆی نوسین و بەرهەمەكانی د. كەمال مەزهەر، وەك ئەوەی كارەكانی پێرفێكت و تەواو بێكەمو كوڕی بن. كەئەوەش خەسڵەتی هیچ بیرمەند و فەیلەسوف و نووسەر و مێژوونووسێكی دیار و گەورەی دنیا نییە.
دووەم - لەسەرەتا تا بەكۆتایی، كتێبەكە گێڕانەوەیەكی سادەی حیكایەتئامێزە، بەبێ هیچ قوڵایەك و بێ هیچ كەشف و دۆزینەوەی نهێنیەكی نوێ و نەوتراوی لەوەوبەرتر، لەبارەی ئەو مێژوونووسە گەورەیەو بەرهەمەكانییەوە.
سێیەم - بەشێك لەناونیشانی كتێبەكە (د. كەمال مەزهەر....... و ڕێبازی لە نوسینەوەی مێژوودا)، زۆر نزیكە لەوتارێك كەپێشتر نووسەری عەرەب (جواد كاظم البیضاني) نوسیویەتی: (كمال مظهر أحمد و منهجه في كتابة التأریخ، ملاحق جریدة المدی 30/11/ ٢٠١١).
سەرباری هەموو ئەوانەش، بەگشتی هەوڵی نوسەرەكەی و كتێبەكەی لەم كاتەدا كە د. كەمال مەزهەر لەنووسین دووركەوتۆتەوەو بەكەمیش باسدەكرێت و ناوی دەهێنرێت، شایەنی دەست خۆشیەو ڕێزگرتنە لەهەوڵ و ماندوو بوونی ئەكادیمستێكی پسپۆڕ و مێژوو نووسێكی گەورەی كورد.