هەرێم نیوز
حکوومەتی هەرێمی کوردستان هەنگاوەکانی بۆ هاوتاکردنی مووچە و ئیمتیازات و شایستە داراییەکانی زیندانیانی سیاسی و ڕاگیراوانی سیاسی لەگەڵ حکوومەتی فیدراڵ دەست پێ کرد و بڕیاری ناردنی شاندێکی باڵاش بۆ بەغدا درا.
ئەمڕۆ سێشەممە، ٩ـی حوزەیرانی ٢٠٢٦، بەگوێرەی راگەیەنراوی وەزارەتی دارایی هەرێمی کوردستان، بە ئامادەبوونی وەزیرانی دارایی و شەهیدان، سکرتێری ئەنجومەنی وەزیران و سەرۆکی فەرمانگەی هەماهەنگی و بەدواداچوون، کۆبوونەوەیەک لە دیوانی وەزارەتی دارایی و ئابووری ئەنجامدرا.
لە کۆبوونەوەکەدا تیشک خرایە سەر جێبەجێکردنی بڕیارەکەی ئەنجومەنی وەزیرانی هەرێم کە لە مانگی ئازاری ئەمساڵدا دەرچووە، ئەوەش دوای لێکتێگەیشتنی هاوبەشی نێوان وەزارەتی شەهیدانی هەرێم و دەزگای زیندانیانی سیاسیی عێراق هاتووەتە ئاراوە.
وەزارەتی دارایی و ئابووری ڕاشیگەیاندووە، بڕیار دراوە لە ئایندەیەکی نزیکدا شاندێکی حکوومەتی هەرێم بە سەرۆکایەتیی وەزیری شەهیدان و کاروباری ئەنفالکراوان سەردانی بەغدا بکات، بە مەبەستی ئەنجامدانی گفتوگۆی کۆتایی و گرتنەبەری ڕێکارە یاسایی و کارگێڕییەکان بۆ هاوتاکردنی مووچە و ئیمتیازاتی زیندانیانی سیاسیی هەرێم لەگەڵ هاوتاکانیان لە حکوومەتی فیدراڵدا.
ئەم هەنگاوە لە چوارچێوەی هەوڵە بەردەوامەکانی حکوومەتی هەرێمی کوردستاندایە بۆ یەکخستنی مووچە و شایستە داراییەکان لە سەرانسەری عێراقدا و دابینکردنی مافە داراییەکانی ئەو توێژانەی کە لە قۆناغە جیاوازەکانی خەباتدا تووشی ئازار و ئەشکەنجە بوونەتەوە.