هەرێم نیوز
ئەمڕۆ یەکشەممە (٢٤ی ئایاری ٢٠٢٦) لە سەلاحەددین، بارزانی پێشوازی لە سەلاحەدین بەهائەدین، ئەمینداری گشتیی یەکگرتووی ئیسلامیی کوردستان کرد؛ لە دیدارێکدا دوایین گۆڕانکارییە سیاسییەکان و دۆخی ناوخۆی هەرێمی کوردستان گفتوگۆی لەسەر کرا.
ئاڵوگۆڕکردنی بیروڕا لەسەر دۆخی عێراق و ناوچەکە
بەپێی ڕاگەیەندراوێکی فەرمیی بارەگای بارزانی، لە سەرەتای دیدارەکەدا، بارزانی و ئەمینداری گشتیی یەکگرتووی ئیسلامی، بە قووڵی بیروڕایان لەبارەی بارودۆخی گشتیی سیاسی، پەرەسەندنە خێراکان لەسەر ئاستی عێراق و ناوچەکە بە گشتی ئاڵوگۆڕ کرد.
تاووتوێکردنی ئاستەنگەکانی بەردەم پڕۆسەی سیاسیی هەرێم
تەوەرێکی دیکەی سەرەکیی نێوان بارزانی سەلاحەدین بەهائەدین، تایبەت بوو بە دۆخی ناوخۆیی هەرێمی کوردستان؛ تێیدا بە چڕی ڕۆشنایی خرایە سەر دۆخی سیاسی و گوزەرانی هاووڵاتییان، و تیشک خرایە سەر سەرجەم ئەو ئاستەنگ و ئاڵنگارییانەی کە لەم قۆناغەدا بەردەم پڕۆسەی سیاسیی هەرێمی کوردستانیان گرتووە، بە مەبەستی لێکنزیکبوونەوە و دۆزینەوەی ڕێگەچارەی گونجاو بۆ پاراستنی یەکڕیزیی نیشتمانی.