هەرێم نیوز
دوای گرژییەکانی ڕۆژی دووشەممە لە گەرووی هورمز، لێپرسراوانی ئەمریکا پێشبینی دەکەن دۆناڵد ترەمپ لە چەند ڕۆژی داهاتوودا فەرمانی دەستپێکردنەوەی هێرشە ئاسمانی و دەریاییەکان بۆ سەر ئێران واژۆ بکات.
گۆڕانکاری لە هەڵوێستی ترەمپ
بەپێی ڕاپۆرتێکی ڕۆژنامەی (وۆڵ ستریت جۆرناڵ)، دۆناڵد ترەمپ سەرۆکی ئەمریکا تا ئێستا هەوڵی دەدا خۆی لە فراوانبوونی شەڕ و تێوەگلانی زیاتر بەدوور بگرێت، بەڵام ڕووداوەکانی دوێنێ و بەئامانجگرتنی کەشتییە جەنگییەکانی ئەمریکا، وایکردووە لێپرسراوانی سەربازی و سیاسیی واشنتن فشاری توند بخەنە سەر کۆشکی سپی بۆ ئەوەی بە فەرمی فەرمانی هێرشکردنە سەر تاران بدات.
لیندسی گراهام: وەڵامەکە دەبێت بەئازار بێت
لیندسی گراهام، سیناتۆری ناسراوی کۆمارییەکان و یەکێک لە لایەنگرانی سەرسەختی دەستوەردانی سەربازی، ڕایگەیاند: "ئێران بە تەواوی ئاگربەستی پێشێل کردووە و نیشانی دا کە بڕوای بە دیپلۆماسیەت نییە." گراهام داوای لە ترەمپ کردووە کە بە هێرشێکی "گەورە، بەهێز و بەئازار" وەڵامی تاران بداتەوە، بە مەرجێک هێرشەکە کورتخایەن بێت و ئامانجە ستراتیژییەکان بپێکێت.
ترەمپ: نامەوێت بجەنگم، بەڵام ڕێگری دەکەم
خودی دۆناڵد ترەمپ لە دوایین لێدوانیدا جەختی لەوە کردەوە کە ئارەزووی هەڵگیرساندنی جەنگێکی گشتگیر ناکات، بەڵام هێڵە سوورەکانی دووپاتکردەوە و وتی: "ناهێڵین ئێران ببێتە خاوەنی چەکی ئەتۆمی." ترەمپ بە شێوەیەکی تەنزئامێز ئاماژەی بە لاوازیی ئێستا نیشاندا و ڕایگەیاند: "ئێران ئێستا نە کەشتیگەلی دەریایی، نە مووشەکی کاریگەر و نە سەرکردەی بەهێزی ماوە" بۆ ئەوەی ڕووبەڕووی ئەمریکا ببێتەوە.
ئەم پەرەسەندنانە لە کاتێکدایە کە ناوچەکە لەبەردەم ئەگەری تەقینەوەی جەنگێکی نوێدایە، بەتایبەت دوای ئەوەی هەردوولا هێزەکانیان لە دەریای عەرەب و گەرووی هورمز خستووەتە حاڵەتی ئامادەباشییەوە.