دواین هەواڵ

ئابوری‌

 1 کاتژمێر پێش ئێستا

زیانەکانی داخستنی کێڵگەی کۆرمۆر ڕۆژانە زیاتر لە حەوت ملیۆن دۆلارە

هەرێم نیوز

زیانی ڕۆژانەی هێرشەکەی سەر کۆرمۆر زیاتر لە 7 ملیۆن دۆلارە و سێ هەزار مێگاوات کارەباش کەمیکردوە.

روانگەی ئیکۆی عێراقیی ڕاپۆرتێكى له‌باره‌ى هێرشه‌كه‌ى سه‌ر كۆمۆره‌وه‌ بڵاوكردوه‌ته‌وه‌ زیانە داراییەکانی خستوەتەڕوو و ڕایگەیاندوە: بەهۆی وەستانی بەرهەمهێنانی غاز لەکێڵگەی غازی کۆرمۆر لەهەرێم، زیانی دارایی ڕۆژانە گەیشتوەتە 7.41 ملیۆن دۆلار.

ئاماژەی بەوەشداوە، کێڵگەی کۆرمۆر پێش هێرشەکە، ڕۆژانە 530 ملیۆن پێ سێجا غازی سروشتیی بەرهەمدەهێنا کە نرخی یەک ملیۆن پێ سێجا نزیکەی 10 هەزار دۆلارە، جگە لەوەش، ڕۆژانە 1,580 تۆن غازی (LPG)و نزیکەی 22 هەزار بەرمیل غازی کۆندێنسەیت (Gas Condensate)ى بەرهەمدەهێنا.

ئەوەش لە کاتێکدایە پێشتر کەمال محەممەد وەزیری کارەبای حکومەتی هەرێمی کوردستان ڕایگەیاند بەهۆی هێرشەکەی سەر کۆرمۆرەوە سێ هەزار مێگاوات بەرهەمی کارەبا کەمیکردوە، بەوەش کارەبای بەڕێژەی 80% کەمیکردوە ڕۆژانە تەنها 4 بۆ 6 کاتژمێر کارەبا بە هاووڵاتییان دەدرێت.

شەوی چوارشەممە لەسەر پێنجشەممەی ڕابردوو، هێرشێکی مووشەکی کرایە سەر کۆگای غازی شلی کێڵگەی کۆرمۆر لە چەمچەماڵ و بەتەواوی وێرانی کرد، ئەمەش بووە هۆی کەمبوونەوەی بڕی کارەبای هەرێمی کوردستان بۆ زیاتر لە دوو هەزار مێگاوات.

 

 



Copyright © 2020 All Rights Reserved Designed And Developed By AVESTA GROUP