هەرێم نیوز
عیراق چەند لیوایەكی رەوانەی سنورەكانی سوریا كرد، وەزیری بەرگریش رایدەگەیەنێت، سوپا ئامادەیه سنوور و ئاسمانی عیراق لەهەر هەڕەشەیەك بپارێزێت.
سەرچاوەیەكی ئەمنی عیراق رایگەیاند،5 لیوای سوپا و حەشدی شەعبی له سنووری عیراق و سوریا جێگیركراون.
هاوكات سابت محەمەد عەباسی وەزیری بەرگری عیراق رایگەیاند، سوپا ئامادەیه سنوور و ئاسمانی عیراق لەهەر هەڕەشەیەك بپارێزێت و ڕێگە نادەن هیچ تیرۆریست و تێكدەرێك دزە بكاتە ناو خاكی عیراق.
ئەمەش لەكاتێكدایە، گرژییە ئەمنییەكان لە سوریا و سنووری عیراق زیادیكردووە، دوای ئەوەی گروپی چەكداریی تەحریر شام بەشێكی حەلەبی كۆنتڕۆڵكرد.
لای خۆیەوە، لیوا یەحیا ڕەسوڵ وتەبێژی فەرماندەی هێزە چەكدارەكانی عیراق رایگەیاند، سنووری عیراق لەگەڵ سوریا بەتەواوی پارێزراوە، بەتایبەتی لە ناوچەكانی باكوری ڕۆژهەڵاتی سوریا، وتیشی هێزەكانی سنوور جگە لە فڕۆكەی بێ فڕۆكەوان و كامێرای گەرمیی، نوێترین چەك و كەلوپەلی سەربازییان پێیە.