هێزێکی 10 هەزار کەسی شاراوە لە ئیسرائیلدا هەن، کە بەهێزى ئەلیکترۆنى شاراوە بەناوبانگن و ئیسرائیل لە کارەکانیدا زۆر پشتیان پێدەبەستێت ، کە پێکهاتوون لە ژمارەیەکی زۆر شارەزای ئەلیکترۆنی و سیخوڕی سەردەمیانە. لەڕێگەى ئەمانەوە هێرشدەکرێتە سەر پێگە سەربازییە هەستیارو نهێنیە گرنگەکان و ڕێگریی دەکرێت لە هێرشی نەیارەکانی ئیسرائیل 8200 سیخوڕی بەسەر هەموو جیهانەوە دەکات بە دەزگاى (CIA)ى ئەمریکاشەوە، هەربۆیە دەزگا ئەمریکیەکەش ئەم سوپا ئەلیکترۆنییەى خستوەتە ڕیزبەندی سێیەمى نەیارو دوژمنەکانى خۆیەوە، هەرچەندە لەڕووى سیاسیشەوە هەردوکیان دوو دیوى یەک دراون .
یەکەى 8200 ى ئیسرائیلی، سەرچاوەى 90% زانیارییەکانى دەزگاى هەواڵگری مۆساد و شێمبێت و سەرجەم دامەزراوە هەواڵگرییەکانى ئیسرائیل یشە، 8200 هەرچی زانیاری هەیە لەسەر نەیارەکانى لە هەرکوێیەک بن و تەنانەت دۆستەکانیشی کۆدەکاتەوە. ئامانج لە دروستکردنى یەکەى 8200 گەڕان و لێکۆڵینەوە بووە لەو هۆکارانەى کە لە جەنگی 1973 دا، کاتێک سوپاى ئیسرائیل لەبەردەم هێرشی عەرەبەکاندا تێکشکا و زیانى گەورەى بەرکەوت هەربۆیە دەستیى کردوە بە دروستکردنى یەکەیەکی نهێنى بۆ ئەوەى بتوانێت ڕێگری لە پێشهاتەکان بکات و لەکاتى ڕوبەڕوبونەوەشدا بزانێت لە کوێوە هێرشی دەکرێتە سەر و هێرشیش بۆ سەر کوێ ئەنجام دەدات بۆ ئەو مەبەستە نیوسەدە پێش ئێستا، ژمارەیەکی زۆر لە قوتابیان و شارەزایانى بەسەر زانکۆ جیهانییەکاندا دابەشکردووە تا بەخێرایی زانستى تەکنۆلۆژیا فێرببن و بتوانن لەو ڕێگەیەوە سەردەمیانە ڕوبەڕوى نەیارەکانیان ببنەوە.
کەچى دواى 50 ساڵ لە کارکردنى بەردەوام، ئەم هێزە زەبەلاحە لەبەردەم هێرشەکانى 7تشرینى یەکەمى 2023 ى حەماسدا زانیارییەکانیان بونە بڵقی سەرئاوو بونە جێگەى ڕەخنەو تەنانەت تانەو تەشەرى دۆستەکانیشیان، ئاخر 8200 ئاگایان لەو هێرشە لەناکاوە نەبوو، پسپۆڕو شارەزاکانى بە تەقەى خۆبەخش و زرمەى بۆمبی چەکدارەکانى حەماس بەئاگا هاتنەوە ئەم هێرشە چاوەڕوان نەکراوەى حەماس، نەک هەر زیانى مادى و گیانى و سەربازی لە ئیسرائیل دا، بەڵکو بووە نەنگی و عەیبەیەکی گەورە بەسەر دەزگاى مۆساد و یەکەى 8200 و دەزگا هەواڵگرییە سەربازییەکانى تریشەوە. سەرەڕای لۆمە ناوخۆییەکانى سەرانى ئیسرائیل لەم دەزگایانە، بەڵام هێشتا لە کارەکانیان نەوەستاون و مانگێک زیاترە شەوو رۆشیان خستوەتە سەر یەک تا بتوانن قەرەبووی ئابڕوی تکاویان بکەنەوە.
تا وەڵامی ملیۆنەها پرسیارى ئەلیکترۆنى و میدیاى و لایەنە پەیوەندیدارەکانى دەوڵەتەکەیان و جووەکانى جیهان و دۆستەکانیان بدەنەوە، کەچۆن ئاگایان لەو هێرشە لەناکاوەى حەماس نەبووە، ئەو هەموو ماوەیەى حەماس بەرنامە ڕێژی کردووە ئەمان و سیخوڕەکانیان لەکوێ بوون؟ لەگەڵ ئەوەشدا لەنێو ئەم دامەزراوەیەدا یەکەیەکی دیکە لەڕێگەى تۆڕی جاڵجاڵۆکەیی ئینتەرنێتەوە سەرقاڵی ئەوەن چۆن هەواڵ و پلانە میدیاییەکانى ئیسرائیل بە ناوەندە جیهانیەکان بگەیەنن و بەشێوەیەک ئاڕاستەیان بکەن کە لەبەرژەوەندی خۆیان بێت تا بتوانن ڕاستیەکان بشێوێنن و روداوەکان هەڵبگێڕنەوەو ئەوەى خۆیان دەیانەوێت بڵاوبکرێتەوە نەک ئەوەى کە ڕاستەقینەیەو ڕوو دەدات.
هەربۆیە بەشێک لە میدیاکانى جیهان کەوتوونەتە نێو ئەم داوەوە، هەرچەندە جاروبار هەندێکیان هەڵەکانیان ڕاست دەکەنەوە و داواى لێبوردن لە بینەرو بیسەر و خوێنەرەکانیان دەکەن، بەڵام هێشتا کارى ئەم بەشە لە یەکەى 8200 دا کارایە و کاریگەریی تەواویان لەسەر ناوەندە میدیاییەکانى جیهان هەستپێدەکرێت. یەکێک لەکارەکانیان سەرەڕای بڕینى هێڵی ئینتەرنێت لە غەززە، لە ناوچەکانى تری فەلەستین بەرنامەى تایبەتییان هەیە، بەشێواندنى زانیارییەکان و ناردنى مەسیجی هەڵە و کۆمێنتى تایبەت بەخۆیان بە زمانە جۆراوجۆرەکان کار بۆ ئەوە دەکەن ڕەوایەتى بە هێرشەکانیان بدەن و حەماس بخەنە نێو بازنەى تاوانبارییەوەو خۆیان لەو لافاوە خوێنە بشارنەوە کە دروستیان کردووە.
یەکەى 8200 پێشوتر کاریان لەسەر کۆمپیوتەرەکانى بەرنامە ئەتۆمییەکەى ئێران کردووە، لەڕێگەى ناردنى ڤایرۆسێکەوە توانیویانە زیاتر لە هەزار فایلى نهێنى لە سیستمى ئەتۆمی ئێراندا بدزن و بشێوێنن، ئەوە لە کاتێکدا کە سەرجەم سیستمی بەرگریی و بەرنامەڕێژییەکەى دامەزراوەى ئەتۆمی نەتەنز خاوەنى سێ هەزار فایل بووە، تەقینەوەکانى نەتەنز ڕویان دەدا ئەوجا ئێرانیەکان بەئاگا دەهاتن کە چى ڕوو دەدات، زاناکانیان لەبەردەمى ماڵەکانیان و لەناو ئۆتۆمبێلەکانیان دەکوژران ئەوجا دەیانزانى کە سیخوڕەکانى ئیسرائیل لەناو وڵاتى ئێراندا بڵاوەیان کردووە یەکێک لە ئامانجەکانى ئەم هێرشانە جگە لەوەى دزینى زانیارییەکانە، دوودڵی و گومان دروستکردنە بۆ لایەنى بەرامبەر کە متمانەیان بە کارە ئەندازیاری و تەکنیکیەکانیان خۆیان نەمێنێت و بگرە ببێتە هۆی بێمتمانەیی بەرامبەر بەخۆیان و پسپۆڕەکانیشیان، وەک ئەوەى ئێستا لە ئێراندا ڕوودەدات کاتێکیش سوپاى ئیسرائیل لە ساڵی 2007 هێرشی کردە سەر دامەزراوەی ئەتۆمی سوریا کە سەرقاڵی بونیاد نانى بوون، یەکەى 8200 لە ڕێگەى ڤایرۆسێکەوە سەریان لە سیستمی بەرگری و ئاگادارکردنەوەى هاتنى فڕۆکە شێواندووە و تا فڕۆکەکەکان بۆردومانەکەیان نەکردووە سیستمى بەرگریی ئاسمانى سوریا ئاگای لە هیچ شتێک نەبووە.
لەگەڵ ئەوەشدا پێشتریش تیمێکیان ناردووەتە شوێنەکە بۆ ئەوەى نمونەیەک لە شت و مەکی ئەو ناوچەیە بگەیەننەوە بە ئیسرائیل کە سەلمێنەرى ئەوە بێت سوریا سەرقاڵی پرۆژەی ئەتۆمییە یەکە سیبریانییەکانی ئەم دەزگایە کار بۆ ئەوە دەکەن ئیسرائیل ببێتە دێوێکی زەبەلاحی تەکنۆلۆژیی ، بەشێوەیەک ئێستا دەستى بەسەر تەکنۆلۆژیاى جیهانیدا گرتووە، ئیتر لە ڕێگەى دروستکردنى ئامێرە تەکنۆلۆژییەکانەوە بێت یان دروستکردنى بەرنامە و ئەپەکانى کۆمپیوتەر و مۆبایل ئیسرائیل لەسەر زەویدا بوەتە خاوەنى کۆمپانیا زەبەلاحەکانى ئینتەرنێتى جیهان و لە ئاسمانیش دەستیان گرتووە بەسەر مانگە دەستکردەکاندا، لەگەڵ ئەوەشدا تۆڕێکی گەورەى ڕاهێنراویان بەجیهاندا بڵاوکردوەتەوە کە کاریان هاککردن و بەدواداچوونى ئەو مەترسییانەیە کە ڕوبەڕوى ئیسرائیل دەبێـتەوە.