دواین هەواڵ

کوردستان‌

 05/12/2022

پارێزگاری هەولێر: له‌ داهاتوویه‌كی نزیکدا نه‌وتی سپی لە سه‌نته‌ری شاره‌كان دابەشدەکرێت

هەرێم نیوز

پارێزگاری هەولێر رایگەیاند، له‌ داهاتوویه‌كی نزیکدا  نه‌وتی سپی لە سه‌نته‌ری شاره‌كان دابەشدەکرێت، دەشڵێت، هه‌ر خێزانێك له‌ به‌رامبه‌ر به‌رمیلێك نه‌وتدا ته‌نها 35%ـی نرخه‌كه‌ی لێوه‌رده‌گیرێت.

ئه‌مڕۆ دووشه‌ممه، ئومێد خۆشناو، پارێزگاری هه‌ولێر لە كۆنفراسێكی رۆژنامه‌وانیدا رایگه‌یاند، پرۆسه‌ی دابه‌شكردنی نه‌وتی سپی به‌سه‌ر هاووڵاتییان به‌ نرخی پاڵپشتیكراو به‌رده‌وامه‌ و له‌ داهاتوویه‌كی نزیكدا له‌ سه‌نته‌ری شاره‌كانیش ده‌ستپێده‌كات.

ئاماژەی بەوەش کرد، دابه‌شكردنی نه‌وتی سپی به‌سه‌ر هاووڵاتییان به‌ نرخی پاڵپشتیكراو كه‌ له‌لایه‌ن حكومه‌تی هه‌رێمی كوردستانه‌وه‌ رێژه‌ی 65%ـی نرخه‌كه‌ی دابینكراوه‌ و هه‌ر خێزانێك له‌ به‌رامبه‌ر به‌رمیلێك نه‌وتدا ته‌نها 35%ـی نرخه‌كه‌ی لێوه‌رده‌گیرێت.

ئەمەش لەکاتێکدایە، دوێنێ یه‌كشه‌ممه‌، فه‌رمانگه‌ی میدیا و زانیاری حكومه‌تی هه‌رێم رایگه‌یاند،  وەزارەتی سامانە سرووشتییەکان، 31 ملیار و 207 ملیۆن و 800 لیتر نه‌وتی سپی له‌ سەرانسەری هەرێمی کوردستان دابەشکردووە، كه‌ تا ئێستا 156 هه‌زار و 539  خێزان سوودمەندبوونە.



Copyright © 2020 All Rights Reserved Designed And Developed By AVESTA GROUP