زۆرن ئه‌و هه‌ڵانه‌ی که‌ له‌ کاتی ڕێجیمکردن ده‌کرێن به‌ مه‌به‌ستی دابه‌زینی کێش به‌ خێرایی که‌ دواتر ئه‌بیته‌ هۆی شکست له‌ دابه‌زینی کێش یان گه‌ڕانه‌وه‌ی قه‌ڵه‌وی و زیاد کردنه‌وه‌ی کێش بەم شێوەیە:-
۱ـ جێبه‌جێکردنی به‌رنامه‌ی رێجیمی زۆر قورس که‌ بڕێکی زۆر که‌م خواردنی تیا بێت : هه‌روه‌ها بڕیای ناواقیعی بۆ نموونه‌ که‌سێک بڕیار ئه‌دات که‌ تا ماوە  خواردنێکی دیاریکراو نه‌خوات، به‌ڵام  دواتر خۆی ناگرێت و په‌شیمان ئه‌بێته‌وه‌، باشترین ڕێگه‌ ئه‌وه‌یه‌ بڵێیت لە ماوەی ڕێجیمەکە نایخۆم.

۲ ــ دوور که‌وتنه‌وه‌ له‌ خۆراکی ته‌ندروست به‌ بیانووی ئه‌وه‌ی کێش زیاتر ده‌که‌ن وه‌ک نه‌خواردنی چه‌وری، له‌ کاتێک دا پێویسته‌ چه‌وری جۆره‌ باشه‌کان بخورێت ، بۆ نموونه‌، زه‌یتی زه‌یتوون و ئۆڤۆگادۆ؛ ڕۆژانه‌ دوو که‌وچک زه‌یتی زه‌یتوون بخورێت و باشتره‌ بۆ چێشت لێنان به‌کاربێت .
ماسی، به‌ تایبه‌ت ماسی سه‌لمون و سه‌ردین و تونه‌ی سپی، باشتره‌ هه‌فته‌ی ۲ـ۳ جار بخورێت به‌ برژاوی و زۆری لێ نه‌خورێت ۰

٣-چه‌ره‌سات، به‌ تایبه‌ت گوێز و باده‌م و فستق و عه‌بید و ده‌نکه‌ کوله‌که‌، به‌ مه‌رجێک بڕێکی زۆری لێ نه‌خورێت چونکه‌ ده‌وڵه‌مه‌ندن به‌ وزه‌ تا نه‌بێته‌ هۆی زیاتر بوونی کێش و باشتره‌ به‌ کاڵی و بێ خوێ بخورێن، نه‌وه‌ک به‌ سوێرکراوی یان سوره‌وه‌کراوی، بۆنموونه‌ گۆێز دوو ده‌نک، باده‌م ۱۰ـ ۲۰ ده‌نک .

٤ ـ هێشتنه‌وه‌ی خۆراکی ناته‌ندروست و ده‌وڵه‌مه‌ند به‌ وزه‌ : وێنه‌ی شیرینی و سارده‌مه‌نی له‌ به‌رده‌ست دا له‌ ناو ماڵ و شوێنی ئیش و زۆر سه‌ردانکردنی ئه‌و شوێنانه‌ی ئه‌و جۆر خۆراکانه‌ی لێن وه‌ک چێشتخانه‌ و سوپه‌رمارکێته‌کان ۰
٥ ـ له‌ بیرچونه‌وه‌ی بڕ و ژماره‌ی ئه‌و خۆراکانه‌ی ڕۆژانه‌ ئه‌خورێت : باشتره‌ ڕۆژانه‌ بزانیت چه‌ندت خواردوه‌ و بینوسی چونکه‌ زۆرینه‌ی ئه‌و که‌سانه‌ی ڕێجیم ئه‌که‌ن هه‌میشه‌ زیاتر ئه‌خۆن له‌ بڕی دیاری کراو.

٦ ـ خواردن به‌ شه‌و: بۆ نموونه‌ ئه‌گه‌ر فێر بوویت به‌ دیار ته‌له‌فزێون و مۆبایلەوە  خواردن بخوێت ئه‌وا بڕێکی زۆر شت ئه‌خوێت که‌ ئه‌بێته‌ هۆی کۆبوونه‌وه‌ی چه‌وری و خوارنی دره‌نگان به‌ شه‌و زۆر خراپتره‌ چونکه‌ ئه‌بێته‌ هۆی دڵه‌کزێ و تێک چوونی خه‌و؛ ئه‌گه‌ر شه‌وان برسیت بوو میوه‌ و سه‌وزه‌ بخۆ .
زۆرگرنگیشه‌ که‌ بزانین خۆڕاگری و به‌رده‌وام بوون و دوور که‌وتنه‌وه‌ له‌ دڵه‌ ڕاوکێ کلیلی سه‌رەکییه‌ له‌ هه‌موو به‌رنامه‌یه‌کی ڕێجیم کردن .

٧ -خواردنی یه‌ک ژه‌م خۆراک له‌ ڕۆژێکدا بە بەردەوامی به‌ مه‌به‌ستی خێرا دابه‌زینی کێش، له‌ ڕاستی دا ئه‌مه‌ ئه‌بێته‌ هۆکاری که‌کردنه‌وه‌ی سوتانی وزه‌ له‌ لایه‌ن له‌شه‌وه‌ ؛ هه‌روه‌ها ئه‌بێته‌ هۆی بێهێزی و سستی ؛ له‌ کۆتایی دا ئه‌و که‌سه‌ توانا و ئاره‌زووی وه‌رزشی نامێنێت یا که‌م ده‌بێته‌وه‌ له‌ کاتێک دا وه‌رزش یه‌کێکه‌ له‌ بنه‌ماکانی دابه‌زینی کێش به‌ شێوه‌یه‌کی ته‌ندروست .

٨- نه‌خواردنه‌وه‌ی ئاو وه‌ک پێویست: به‌ هەر پاساوێکەوە بێت ئاو خواردنه‌وه‌ به‌ بڕی گونجاو هه‌نگاوێکی گرنگه‌ بۆ دابه‌زینی کێش و چونکه‌ ئاو هیچ وزه‌یه‌کی تیا نیه‌؛ چه‌ندی لێ بخورێته‌وه‌ نابێته‌ هۆی زۆربوونی کێش .

٩ -نه‌خواردنی ژه‌می به‌یانی، له‌ کاتێکدا گرنگترین ژه‌می ڕۆژه‌ و نه‌خواردنی ئه‌م ژه‌مه‌ ئه‌بێته‌ هۆی ئه‌وه‌ی دابه‌زینی ڕێژه‌ی سوتانی وزه‌ و هه‌روه‌ها له‌ ئه‌نجامدا ساتی نیوه‌ڕۆ ئه‌و که‌سه‌ بڕێکی زۆر خۆراک بخوات.

١٠- دوور که‌وتنه‌وه‌ له‌ خواردن له‌ نێوان ژه‌مه‌کان لە کاتی برسیەتی دا ؛ به‌ پێچه‌وانه‌وه‌ پێویسته‌ میوه‌ و سه‌وزه‌ی ڕێگاپیدراو بە گوێرەی ڕێجیمیەکە بخورێت له‌ نێوان ژه‌مه‌کاندا، به‌ڵام به‌ بڕێکی که‌م و جۆری گونجاو یا پیاڵەیەک چەرەس.

ئا: دکتۆر کامه‌ران رسوڵ ژاژڵه‌یی ، پسپۆڕی زانستی خۆراک