• هه‌رێم نیوز
  ماوه‌ی‌ چه‌ند رۆژێكه‌ نێوانی ئێران و ئازه‌ربایجان بۆنی شه‌ڕی گرتوه‌، ترس له‌ ئیسرائیل له‌لایه‌ك و ترس له‌و داعشانه‌ی‌ له‌لایه‌ن توركیاوه‌ بۆ شه‌ڕی قه‌ره‌باغ برابونه‌ ئه‌و وڵاته‌، خه‌وی له‌ چاوی به‌رپرسانی ئێران تۆراندوه‌.
  
  شاره‌زایانی دۆخه‌كه‌، مه‌ترسی ئه‌وه‌ ده‌خه‌نه‌ڕو، په‌یوه‌ندییه‌كانی نێوان باكۆ و تاران به‌ره‌و پێكدادانی سه‌ربازی په‌لبكێشێت و كۆتایی به‌ هێوری چه‌ند ساڵه‌ی‌ نێوانیان بێت.
  
  هۆكاری سه‌رهه‌ڵدانی كێشه‌كه‌ له‌ كۆنترۆڵكردنه‌وه‌ی‌ هه‌رێمی قه‌ره‌باغه‌وه‌ سه‌ریهه‌ڵداوه‌ كه‌ بۆ ماوه‌ی‌ 30 ساڵ له‌لایه‌ن ئه‌رمیناوه‌ ده‌ستی به‌سه‌رداگیرابو، دوای كۆنترۆڵكردنه‌وه‌ی‌ هه‌رێمه‌كه‌، ئێستا ئازه‌ربایجان خاڵی سنوری له‌گه‌ڵ ئێران و توركیادا هه‌یه‌.
  
  ئێرانییه‌كان ده‌ڵێن، زانیارییان هه‌یه‌ 1000 ئیسرائیلی و 1800 چه‌كداری داعش له‌ناو ئازه‌ربایجاندان، به‌و هۆیه‌وه‌ له‌ چه‌ند رۆژی رابوردو مانۆڕێكی گه‌وره‌ی سه‌ربازییان له‌سه‌ر سنور له‌گه‌ڵ ئازه‌ربایجان ئه‌نجامدا به‌ناوی‌ "فه‌تحكارانی خه‌یبه‌ر" وه‌ك ئاماژه‌یه‌ك بۆ له‌ناوبردنی ئه‌و جوله‌كانه‌ی له‌قه‌ڵای خه‌یبه‌ر له‌ نزیك شاری مه‌دینه‌ له‌لایه‌ن مسوڵمانه‌كانه‌وه‌ له‌سه‌رده‌می پێغه‌مبه‌ری ئیسلامدا شه‌ڕیان له‌گه‌ڵدا كراو هه‌رچیه‌كیان لێ كوژرا كوژراو ژن و مناڵه‌كانیشیان به‌دیل گیران.
  
  ئه‌و یه‌كه‌ سه‌ربازییه‌ ئێرانیانه‌ی‌ كه‌ بۆ مانۆڕه‌كه‌ له‌سه‌ر سنوری ئازه‌ربایجان جوڵه‌یان پێكراوه‌، له‌ یه‌كه‌كانی ئاسمانی‌ و تۆپهاوێژی و به‌رپه‌رچدانه‌وه‌و یه‌كه‌ ئه‌ندازیارییه‌كان پێكهاتون، له‌ به‌رامبه‌ر ئه‌و كاره‌ی‌ ئێراندا، ئازه‌ربایجان و توركیاش هێزیان له‌سه‌ر سنور بڵاوه‌پێكردوه‌، به‌شێوه‌یه‌كی گشتیش ره‌وشه‌كه‌ له‌ دۆخێكدایه‌ شرۆڤه‌كاران به‌ دوری نازانن پێكدادانی سه‌ربازی بێته‌ ئارا.
  
  ئیلهام عه‌لیف، سه‌رۆكی ئازه‌ربایجان له‌سه‌ر مانۆڕه‌كه‌ی‌ ئێران ده‌ڵێت، هه‌ر ده‌وڵه‌وتێك بۆی هه‌یه‌ له‌سه‌ر خاكی خۆی مانۆر ئه‌نجان بدات، به‌ڵام بۆ ئێستاو بۆ له‌سه‌ر سنوره‌كانی ئێمه‌؟ بۆچی دوای كۆتاییهێنان به‌ 30 ساڵ داگیركاری زه‌وییه‌كه‌مان ئه‌و كاره‌ ئه‌نجام ده‌درێت؟
  
  سه‌عیدی خه‌تیب زاده‌، وته‌بێژی وه‌زاره‌تی ده‌ره‌وه‌ی‌ ئێران رایده‌گه‌یه‌نێت، ئه‌وان له‌ جوڵه‌و لێدوانی ئیسرائیلییه‌كان له‌سه‌ر خاكی ئازه‌ربایجان نیگه‌رانن و ته‌ئكید له‌وه‌شده‌كاته‌وه‌، كه‌ ده‌توانن به‌رگری له‌ ئاسایشی وڵاته‌كه‌یان بكه‌ن.
  
  چاودێران ده‌ڵێن، قسه‌كردن له‌ بونی داعش و ئیسرائیلییه‌كان له‌سه‌ر خاكی ئازه‌ربایجان ته‌نها به‌هانه‌یه‌، هۆكاری سه‌ره‌كی نیگه‌رانییه‌كانی ئێران ئه‌وه‌یه‌ له‌شه‌ڕی گرتنه‌وه‌ی‌ قه‌ره‌باغه‌وه‌، بێ سنور توركیا له‌ ئازه‌ربایجان نزیكبوه‌ته‌وه‌و بانگه‌شه‌ بۆئه‌وه‌ش ده‌كرێت ئازه‌ربایجان و توركیا "دو ده‌وڵه‌ت و یه‌ك نه‌ته‌وه‌ن"، ئه‌وه‌ش كه‌ هۆكاربو بۆئه‌وه‌ی‌ نیگه‌رانییه‌كانی ئێران بته‌قێته‌وه‌، رێگریكردنی ئازه‌ربایجان بو له‌ تێپه‌ڕینی بارهه‌ڵگره‌ ئێرانییه‌كان به‌ناو خاكه‌كه‌یدا كه‌ به‌ره‌و ئه‌رمه‌نستان كه‌وتبونه‌ڕێ.
  
  توانا سه‌ربازییه‌كانی ئێران و ئازه‌ربایجان به‌ یه‌ك به‌راورد ناكرێن، به‌ڵام چاودێران باس له‌وه‌ ده‌كه‌ن، هه‌ر كه‌موكوڕییه‌ك له‌ توانای سه‌ربازی ئازه‌ربایجاندا هه‌بێت، له‌لایه‌ن توركیاوه‌ قه‌ره‌بو ده‌كرێته‌وه‌و ئه‌وه‌ش وایكردوه‌ ده‌سه‌ڵاتدارانی باكۆ سڵ نه‌كه‌نه‌وه‌ له‌ هه‌ر روبه‌ڕوبونه‌وه‌یه‌كی سه‌ربازی گریمانه‌كراو، هاوكات، شاره‌زایانی ئیسرائیلی به‌ چڕوپڕی كۆمه‌كی ئازه‌ربایجان ده‌كه‌ن و به‌ فڕۆكه‌ی‌ بێ فڕۆكه‌وان، سوپای ئه‌و وڵاته‌یان تۆكمه‌ كردوه‌.