دواین هەواڵ

ڕاپۆرت و چاوپێکەوتن‌

 پێش 1 هەفتە

ئایا وەرگرتنى ژەمى سێیەمى ڤاکسین پێویستە!؟

هەرێم نیوز

بوچونەکان بۆ وەرگرتنى ژەمى سێیەمى ڤاکسین، سەرهەڵەدەن و زانایانیش وەرگرتنى ژەمى سیێەمى ڤاکسین بە پێویست نازانن.

بەپێى ڕاپۆرتێکى دەنگى ئەمریکا، گروپێکی شارەزای ڤاکسینی نێودەوڵەتى دژی ئەوەن دەرزی سێهەمی دژ بە کۆڤید-19 لە خەڵکی ئاسایی بدرێت و ئەمەش بۆچونێکە دژ بەو هەوڵانەی لە ئەمەریکا و وڵاتانی تر دەدرێن بۆ ڕوبەڕوبونەوەی دوبارە زیادبونەوەی حاڵەتەکانی کۆرۆنا.

لە نوسراوێکدا کە ڕۆژی دووشەممە لە گۆڤاری تەندروستی The Lancet بڵاو کراوەتەوە، ئەو شارەزایانە دەڵێن لێکۆڵینەوەکانی ئەم دواییانە دەریدەخەن کە ڤاکسینەکانی کە ئێستا لە سەرانسەری جیهاندا بەکاردەهێنرێن بەردەوامن لە دابینکردنی پاراستنێکی بەهێز لە دژی ڤایرۆسەکە سەرەڕای بوونی جۆری دێڵتای ڤایرۆسەکە. ئەو ڤاکسینانە زۆر کاریگەربوون کە کەمکردنەوەی گرتنی ڤایرۆسەکە بو توندی و مانەوە لە نەخۆشخانە بەهۆی ڤایرۆسەکەوە.

مشتومڕکردن لەسەر لێدانی دەرزی سێهەمی ڤاکسینی دژ بە کۆڤید-19 لە کاتێکدا دەستیپێکرد کە لێکۆڵینەوەکانی کە لە ئیسرائیل ئەنجام دراون دەریان خستووە کاریگەرییەکانی دوو بەشی ڤاکسینی فایزەر بە شێوەیەکی بەرچاو کەمیان کردووە لە نێو خەڵکی بەساڵاچوودا کە لە سەرەتای ئەم ساڵ دژ بە ڤایرۆسەکە کوترابوون. ئەو زانیاریانە وای کرد کە ئیسرائیل دەستبکات بە دابەشکردنی بەشێکی تری ڤاکسین بۆ کەسانی تەمەن 50 ساڵ و سەروتر.

نوسەرانی بابەتەکە پێشنیازی ئەوە دەکەن ڤاکسینەکان هەمواربکرێنەوە بۆ گونجاندن لەگەڵ گۆڕانکاریەکانی ڤایرۆسەکە لە بری ئەوەی دەرزی زیاتر لە خەڵکی بدرێت.

نوسەرەکان بریتین لە دوو زانای پێشەنگ لەگەڵ ڕێکخراوی تەندروستی جیهانی، ئانا ماریا هینۆ ڕیسترپۆ و سۆمییا سوامیناتان و دکتۆر ماریان گرۆبەر و دکتۆر فلیپ کراوس، دوو بەرپرسی سەرەکی لە بەشی پێداچوونەوەی ڤاکسینی بەڕێوەبەرایەتی خۆراک و دەرمانی ئەمەریکا کە هەردووکیان بەرلە کۆتایی ئەمساڵ پۆستەکانیان کۆتاییپێدێت.

بەم دواییانە ڕۆژنامەوی نیویۆرک تایمز ڕایگەیاند گرۆبەر و کراوس دڵگرانن لە ڕاگەیاندنی ئەم دواییانەی بەڕێوەبەرایەتی بایدن لەسەر دەرزی سێهەم بۆ هەندێک لە ئەمەریکاییەکان لە سەرەتای مانگی داهاتوودا، بەر لەوەی لەلایەن ڕێکخراوی خۆراک و دەرمانەوە پێداچوونەوەی تەواوی بۆبکرێت.

لە ئێستادا بەڕێوەبەرایەتی خۆراک و دەرمانی ئەمەریکا نزیکە لەوەی بڕیار لەسەر ڤاکسینی کۆڤید-19 بۆ منداڵانی کەمتر لە 12 ساڵان پەسەند بکات.
لە مانگی ڕابردووشدا هەردوو بەرێوەبەرایەتی خۆراک و دەرمان و نێوەندی کۆنترۆڵکردن و ڕێگریکردن لە نەخۆشییەکان پێشنیازی ئەوەیان کرد دەرزی سێهەمی فایزەر یان مۆدێرنا بۆ هەندێک لەو کەسانە پەسەند بکرێت کە سیستمی بەرگری لەشیان لاوازە.

بەڕێوەبەری گشتی ڕێکخراوی تەندروستی جیهانی تێدرۆس ئەدهانۆم گێبرێسیس بەم دواییانە داوای لە وڵاتە دەوڵەمەندەکان کرد دەستبەرداری بەشی سێهەمی ڤاکسینی دژ بە کۆرۆنا بن لە بری ئەوە هەوڵ بدەن وڵاتە هەژارەکان و مامناوەندەکان دەستیان ڕابگات بە ڤاکسینەکان.

بڕیارە ڕۆژی چوارشەممە سەرۆک وەزیری بەریتانیا بۆریس جۆنسن دابینکردنی دەرزی سێهەمی ڤاکسینی دژ بە کۆرۆنا بۆ ئەو هاووڵاتیانەی تەمەنیان لە 50 ساڵان بەسەرەوەیە بۆ ئەم زستانە ڕابگەیەنێت.



Copyright © 2020 All Rights Reserved Designed And Developed By AVESTA GROUP