هەرێم نیوز

وه‌زیری ده‌ره‌وه‌ی عێراق رایده‌گه‌یه‌نێت، پێویستمان به‌ گفتوگۆ هەیە  له‌ ناوه‌وه‌ و ده‌ره‌وه‌ی عێراق بۆ ئەوەى كۆنترۆڵكردنی گرووپه‌ چه‌كداره‌كان بکەین و  جەختیش دەکاتەوە لەوەى، هەڵوێستى ئه‌و گرووپانه‌ خزمه‌ت به‌ ده‌وڵه‌ت ناكات.

 فوئاد حوسێن، وه‌زیری ده‌ره‌وه‌ی عێراق له‌ گفتوگۆیه‌كی رۆژنامه‌وانیدا ئاماژەى بەوەدا، په‌یوه‌ندییه‌كانی ئێران و ئه‌مه‌ریكا كاریگه‌ری راسته‌وخۆی له‌ سه‌ر عێراق ده‌بێت.

وه‌زیری ده‌ره‌وه‌ی عێراق، له‌ باره‌ی هه‌ڵبژاردنه‌كانی پێشوخته‌ی عێراقی، كه‌ بڕیاره له‌ مانگی ئۆكتۆبه‌ری ئه‌مساڵ به‌ڕێوه‌بچن،‌ ووتى: ناكرێت دۆخی ئه‌منی ببێته‌ هۆكارێك بۆ دواخستنی هه‌ڵبژاردن و روونیشكرده‌وه‌، كه‌ بوونی چاودێرانی نێوده‌وڵه‌تی، به‌ڵگه‌یه‌ له‌سه‌ر پاكی و بێگه‌ردی له‌ به‌ڕێوه‌چوونی پرۆسه‌ی هه‌ڵبژاردن.

ئه‌مه‌ له‌كاتێكدایه‌،  تابێت بازنەى بایکۆتکردنى هەڵبژاردنەکان لە لایەن حیزبە سیاسییەکانەوە فراوانتر ئەبێت و چه‌ند لایه‌نێكی دیاری عێراقی رایانگه‌یاندووه‌، به‌هۆی نه‌بوونی ژینگه‌یه‌كی گونجاو و نه‌بوونی سه‌قامگیری، بایكۆتی هه‌ڵبژاردنه‌كانی داهاتوو ده‌كه‌ن.