دواى بڕیارەکانى جۆ بایدن، سەرۆکى ئەمریکا، بۆ
کشانەوەى هێزە شەڕکەرەکانیان لەعێراق، هەرزو کاردانەوەى میلیشیا شیعەکانى عێراقى، بەدواى
خۆیدا هێناو بەجۆرێ بەسەر دووبەرە دابەش بوون. بەرەیەکیان پێشوازى لەو بڕیارە ئەکەن
و بەرەیەکى تریشیان وەک سووکردنى ئەو فشارانە لەیەکى ئەدەنەوە کە لەسەر مستەفا کازمى، دروست بووە.
بایدن بۆ کازمى، "پەیوەندییەکانی ئەمه‌ریکا
لەگەڵ عێراق بۆ لەمەودوا دەچنە قۆناغێکی نوێوە"
جۆ بایدن، سەرۆکی ئەمه‌ریکا بەفەرمی کۆتایهاتنی
ئەرکی سەربازە شەرکەرەکانی وڵاتەکەی لە عێراق راگەیاند. بایدن بۆ یەکەمجار و لە
ئۆڤاڵ ئۆفیس بە ئاشکرا بە مستەفا کازمی، سەرۆك وەزیرانی عێراقی وتووە:
پەیوەندییەکانی ئەمه‌ریکا لەگەڵ عێراق بۆ لەمەودوا دەچنە قۆناغێکی نوێ.
ئەم هەواڵە بەشێك لە میلیشیاکانی سەربە ئێرانی لە
عێراق دڵخۆشکردووە، هەواڵێك چەندین ساڵە چاوەرێن و هەتا رادەی هەڕەشە و هێرش
کاریان بۆ کردووە، بەشێوەیەك تەنیا ئەمساڵ زیاتر لە 50 هێرشیان کردووەتە سەر به‌رژه‌وه‌ندییه‌كانی
ئەمه‌ریکا لە هەرێمی کوردستان و عێراق.
بایدن، بە دیاریکراوی بە مستەفا کازمى، وتووە: لە کۆتایی ئەمساڵەوە
کۆتایی بە ئەرکی سەربازە شەڕکەرەکانمان دەهێنین، لە ئەرکی راوێژ و راهێنان بە هێزە
عێراقیەکان و شەڕی هاوبەشمان لە دژی داعش بەردەوام دەبین.
میلیشیا شیعەکان بۆ سەر دوو بەرە دابەش بوون
هاوپەیمانی فەتح، ئەم هەڵوێستەی ئەمه‌ریکا بە
ئەرێنی و گەڕانەوەی سەروەری تەواو بۆ عێراق ناودەبات و موقتەدا سەدر، پیشوازی لێدەکات.
لەلایەکى ترەوە لیواکانی ئیمام عەلیش، دەڵێن: سوپاسی حکومەتی
عێراق دەکەین، بۆ بەجێگەیاندنی بەڵێنەکانیبەڵام گومانیان هەیە لەسەر زەوی وەك خۆی
جێبەجێبکرێت. پێیانوایە ئەم قسانەی بایدن لەکاتی پێشوازی لە کازمی و ناردنی 500
هەزار ژەمی ڤاکسین بۆ عێراق بۆ پێدانەوەی هەیبەت و کەمکرنەوەی فشارەکان بووە لەسەر
کازمی، بۆ ئەوەی وەك سەرۆکی ئەمه‌ریکا جەختیکردەوە، بە هاوکاری وڵاتانی هاریکاری
کەنداو و نەتەوەیەکگرتوەکان هەڵبژاردنەکانی ئەکتۆبەری ئەمساڵ بەرێوەبچن.
جاك واڵتن و رێناد مەنسوور، دوو شارەزا و پسپۆری
سیاسەتی عێراقن بەم جۆرە دیدى خۆیان لەسەر کشانەوەى هێزە شەڕکەرەکانى ئەمریکا لە عێراق دەردەبڕن:
"سیاسەتی پشت راگەیاندنی ئەم بڕیارەی ئەمه‌ریکا
ئەو ناکۆکییەیە، كه لەنێوان ئەمه‌ریکا و ئێران لە عێراقدا هەیە"
جاك واڵتن، ئەندامی پەیمانگەی شاهانەی یەکگرتوو
بۆ بەرگری و ئاسایش له‌وباره‌یه‌وه گوتی: "پێش هەموو شتێك ئەم راگەێندراوە
لە ئیدارەی پێشووش ئاماژەی پێدراوە. دواتر، کەمکردنەوەی ژمارەی سەرباز گرنگ نیە،
بەڵکو گۆڕێنی رۆڵی ئەمه‌ریکا گرنگە. مەبەست لە گۆڕینی رۆڵ ئەوەیە، چیتر ئەمه‌ریکا
بەشداری شەڕ ناکات و تەنیا هاوکار دەبێت لە شەڕی دژی پاشماوەکانی داعش. پێموایە
سیاسەتی پیشت راگەیاندنی ئەم بڕیارەی ئەمه‌ریکا ئەو ناکۆکییەیە، كه لەنێوان ئەمه‌ریکا
و ئێران لە عێراقدا هەیە."
"دەسەڵاتی ئەمه‌ریکا لە عێراق سنووردار
دەکرێت"
رێناد مەنسوور، بەڕێوبەری پرۆژەی دەستپێشخەری
عێراق لە چاتام هاوسیش جه‌خت ده‌كاته‌وه، "چەندین ساڵە ئەمه‌ریکا کاریگەری
خۆی لە عێراق لەدەستداوە. بەڕوونی، بیرۆکەی بنیادنانەوە و دروستکردنەوەی عێراق، کە
ئەمه‌ریکا دەتوانێ جارێکی دیکە ئەو وڵاتە بخاتەوە سەرپێ شکستی هێنا، ئەمەش لاوازی
توانای ئەمه‌ریکا نیشان دەدات. بە دیوێکی دیکەدا بۆ ئەو خەونەش نەما، کە ئیتر
وڵاتانی ئەوروپی و رۆژئاوایی بچنە هەر وڵاتێکی رۆژهەڵاتی ناوەراست و ئاسیا، ئیتر
هەمووشت باش دەبێت. پێموایە ئیتر وەك ئەوەی لە 2003 بینیمان، دەسەڵاتی ئەمه‌ریکا
لە عێراق سنووردار دەکرێت."
مێژوویەک لە مانەوە، لە خاکى عێراقدا ..
لە 18 ساڵی رابردوودا نزیکەی 140 هەزار سەربازی
ئەمه‌ریکی هاتوونەتە عێراق، بۆ شەڕی رووخاندی رژێمی سەددام 130 هەزار سەرباز.
ساڵی 2011 و لەسەر داواکاری نوری مالکی، سەرۆك
وەزیرانی ئەو کاتی عێراق باراك ئۆباما سەرۆکی پێشووتری ئەمه‌ریکا سەربازەکانی
وڵاتەکەی کشاندەوە.
لە 2014 و لەگەڵ سەرهەڵدانی داعش جارێکی دیکە
عێراق داوای هاوکاری لە ئەمه‌ریکا کرد و نزیکەی 6 هەزار سەربازی ئەمه‌ریکی هاتنەوە
عێراق.
ساڵی 2017 عێراق تێکشاندی داعشی راگەیاند و
جارێکی دیکە دەرکردنی سوپای ئەمه‌ریکا هاتەوە بەرباس.
ژمارەی ئەو سەربازانە بۆ 2 هەزار 500 سەرباز
کەمکرایەوە. ئێستاش رۆڵی ئەو سەربازانە لە کۆتایی ئەمساڵەوە دەگۆڕێت بۆ راوێژکار و
راهێنەر، ئەمه‌ریکا چاوی لە هەڵبژاردنەکانی ئۆکتۆبەرە، دوای هەڵبژاردنەکان پێشبینی
دەکرێت جارێکی دیکە ژمارەی سەربازەکان و سیاسەتی ئەمه‌ریکاش بەرامبەر عێراق
گۆڕانکاری بەسەردا بێت.