دواین هەواڵ

هەمەرەنگ‌

 20/05/2021

چین دوو دێنەی مەریخی بڵاوکردەوە

دوو وێنەیەی مەریخ

هەرێم نیوز

ئیدارەی بۆشایی ئاسمانیی نیشتیمانیی چین، دوو وێنەی رووی مەریخی بڵاوكردەوە كە بە كامێرای كەشتی نیشتنەوەیی (ژورۆنگ) گیراون، یەكێکیان رەنگاوڕەنگە و ئەوی دیكەشیان رەشوسپییە و تێیدا بەشێك لە گەڕۆكەكە و ناوچەی ناسراو بە دەشتایی (یوتۆپیا پلانیشیا) دەركەوتوونە.

وێنەکان رۆژی چوارشەممە 2021.5.19 بڵاوکراونەتەوە، گرتە رەنگاوڕەنگەكە لەڕێگەی ستوونی هەڵگری كامێرای سەرەكییەكە وەرگیراوە و تێیدا بەشی دواوەی گەڕۆكەكە دەركەوتووە لەگەڵ تەختەكانی بەرهەمهێنانی وزەی كارەبا لە تیشكی خۆر، وێنە رەشوسپییەكەش بەشی پێشەوەی گەڕۆكەكە و رووی مەریخ دەركەوتووە و لەڕێگەی كامێرای پێشەوەیدا وەرگیراوە. 

جگە لەو دوو وێنە فۆتۆگرافییە، ئیدارەكە دوو گرتەی ڤیدیۆیی كورتی بڵاوكردووەتەوە و تێیدا كەپسوولەی گەڕۆكەكە دەردەكەوێت لەساتی جیابوونەوە لە كەشتی خولگەیی (تیانوین -1) و دووركەوتنەوەی بۆ نیشتنەوە لەسەر رووی مەریخدا. 

وا چاوەڕوان دەكرێت رۆژی هەینی 21-05-2021 یان شەممە، رووداوە مێژووییەكە رووبدات، ئەویش دابەزینی گەڕۆكی شەش ویلی (ژوڕۆنگ)ە لەسەر پشتی كەشتی نیشتنەوە بۆ سەر خاكی رووی ئەو هەسارەیە.

کەشتی ژوڕۆنگ لە تەممووزی 2020دا بەڕێکرا و بە حەوت مانگ گەیشتە سەر مەریخ.



Copyright © 2020 All Rights Reserved Designed And Developed By AVESTA GROUP